Leitza prest dago San Tiburtzio jaiak hasteko
Datorren larunbatetik aurrera izango dira festak ofizialki bertan, baina atzo umeen eguna izanik, txupinazoa izan zen besteak beste
Saroi Zubillaga eta Xuban Ramallori egokitu zaie aurtengo San Tiburtzio jaietako umeen eguneko txupina piztea. Biak ere pozik zeuden udaletxeko areto nagusian aurretik Udalak eskainitako ... gosarian une hori noiz iritsiko zain. Pozik eta urduri, azken batean herriko plazan bildutako bizilagunak begira izango zituzten. Hala ere, ongi babestuta zeuden udal ordezkariaz gain, gosarian Erleta herri eskolako LHko 6. mailako ikasle guztiak, edo gehienak, ondoan zituzten eta euren babesa eta animoak ez zitzaizkien faltatu une berezi horretan.
Goizeko 10:30ean, puntual, piztu zuten lehen txupina txalo eta oihuen artean. Saroiek eta Xubanek piztu eta gero, nahi izan zuten guztiek ohore hori izan zuten. Bitartean, Xubanek aitortzen zuen «pozik» zegoela berari egokitu zitzaiola txupina piztea gelako ikasleen artean eta «nire anaiak ere bota zuen», beraz, arrazoi bikoitza zuen gustura hasteko festak.
Udaletxeko ekitaldia bukatu orduko, 'entzierroko zezenak', gurpil dutenak , zain zituzten Leitzako gaztetxoek jai giroan murgilduta jarraitzeko. Udaletxeko ekitaldian, benetakoak eskatu zituzten, baina aurten erraldoien konpartsak dituenekin konformatu beharko dute leitzar gazteek. Hauekin ere primeran pasatzen dute eta lasterraldi ba-tzuk egiten dituzte, ez baitira makalak!
Umeen egunaren ekitaldi gehienak herriko plazan burutu ziren eguraldi lagun, eta goizean zehar ume eta gaztetxo ugarik parte hartu zuten antolatutako ekitaldietan. Besteak beste, Denok Bat guraso elkarteak prestatutako Jokai jokuekin.
Arratsaldean berriz, Leitzako erraldoi eta buruhandien kon-partsa plazatik abiatu zen kalejiran dantza eginez. Gero, plazan bertan Aurrerako dantzari txikien emanaldia izan zen jende ugari elkartuz. Saioa umeen ingurutxoarekin bukatu zen parte hartze handiarekin.
Segidan, goxokiak banatu zituzten eta eguna ongi amaitzeko Mikeltxi DJren saioa izan zen. Ondoren, suzko zezena atera zen eta haurrek primeran pasatu zuten, eguna bikain bukatuz.
San Tiburtzio jaiak datorren larunbatean hasiko dira ofizialki Leitzan. Egun horretan piztuko da, jaiei hasiera emango dion suziria. Aurretik, goizean zehar ekitaldi desberdinak antolatu dituzte. Horien artean, udaletxeko karrapen kantu bazkari herrikoia egingo da 14:30etik aurrera.
Arratsaldeko 18:30ean, txupinazoa udaletxeko balkoitik eta ondoren, Incansables txaranga, txistulariak, Leitzako eta Mendillorriko erraldoien konpartsak aterako dira kalejiran herrian barna. La Jodedera taldearen kontzertua, suzko zezena eta Itzal taldearen kontzertua izango dira ondoren, eguna DJ Fresa Morango eta Incansables txarangaren doinuekin amaituz.
¿Tienes una suscripción? Inicia sesión
