Debako zubiaren birgaitzeak beste sari bat jaso dezake
Europako Ondarearen Saria jaso ondoren, abuztuaren 28a arte herritarren bozkak jasoko dira Publikoaren Saria aukeratzeko
Itziar Altuna
Donosita
Ostirala, 25 abuztua 2023, 17:26
Europako Batzordeak eta Europa Nostrak ondarearen arloan saritutako proiektuen artean Debako Zubiaren birgaitzea aukeratu dute. Horrela eman zuten jakitera ekainean. Antolatzaileek adierazi zutenez, «ingeniaritza zibilaren adibide zoragarri bat den XIX. mendeko harrizko zubi hori birgaitzeko, ahaztutako materialei eta teknikei buruzko ikerketa historiko zabala beharrezkoa izan zen, eta horretarako diziplinarteko lankidetza teknikoaz baliatu zen».
Ondarearen Europako saririk garrantzitsuenak dira hauek. Guztira 21 herrialdetako 30 proiektu saritu dituzte, arlo desberdinetan, eta orain, aurtengo irabazleen artean herritarrek parte hartu eta erabaki ahal izango dute zer proiektuk irabazten duen 2023ko Publikoaren Saria (10.000 euro), esteka honetan sartuta: http://vote.europanostra.org. Debako zubiaren proiektuaren alde bozkatzeko epea abuztuaren 28an, astelehenean, itxiko da.
Irabazleak Ondarearen Europako Sarien Ekitaldian omenduko dituzte, datorren irailaren 28an, Veneziako Palazzo del Cinema jauregian. Ekitaldi ospetsu horretan, Grand Prix-en irabazleak eta Publikoaren Sariaren irabazleak iragarriko dira, aurtengo irabazleen artean aukeratuak,
Birgaitze proiektua
Debako zubia 1866an eraikia da, eta Donejakue Bideko monumentu multzoaren barruan babestuta dago. 2018ko uztailean erdiko zubi bularra asentatu zen, eta egitura kolapsatzear gelditu zen. Ondorioz, zirkulazioa itxi behar izan zuten, eta eragozpen asko sortu zitzaizkien Deba eta Mutrikuko biztanleei. Bere eskumenekoa ez izan arren, Gipuzkoako Foru Aldundia arduratu zen proiektua bere gain hartzeaz.
Larrialdiko lehen fase batean, bi funtzio betetzen zituen egitura bat ezarri zen: zubiari eustea, kolapsoa saihesteko, eta oinezkoen erabilera bermatzea. Bitarteko osagarriak oso garrantzitsuak dira proiektu honetan, eta espresuki egokitu eta diseinatu ziren zubi hori birgaitzeko. Egonkortasuna bermatu ondoren, birgaitze proiektua lantzen hasi ziren, eta lan horrek XIX. mendeko zubien eraikuntzan ahaztutako teknikak aztertzea ekarri zuen. Azkenik, gangak desmuntatu zituzten, aldez aurretik harlandua zerrendatuz, erdiko pila berreskuratuz eta bi gangak berreraikiz.
Ia lau urteko lanaren ondoren, egitura enblematiko honek oinezkoentzako bidea 2022ko maiatzaren 26an ireki zuen berriro.
