Itzuleko saioa Zornotza aretoan izango da larunbatean 12:00etan
Bi taldeek euren hamaikakoak jakinarazi dituzte: Realaren aldetik Andoni Egaña, Alaia Martin eta Beñat Gaztelumendi arituko dira; Athleticen izenean Igor Elortzak, Onintza Enbeitak eta Anjel Mari Peñagarikanok arituko dira
Bertsolaritza, euskal kultura eta euskara sustatzea helburu duen Bertsoderbiak jakinarazi ditu itzuliko saiorako 'hamaikakoak'. Lehiaren 24. ekitaldia larunbat eguerdian, 12:00etan, izango da Zornotza aretoan eta Realaren aldetik Andoni Egaña, Alaia Martin eta Beñat Gaztelumendi arituko dira. Bestetik, Athleticen izenean arituko den hirukotea Igor Elortzak, Onintza Enbeitak eta Anjel Mari Peñagarikanok osatuko dute.
Bi 'taldeek' Xabier Irakulis gai-jartzaileak proposatutako gaiak izango dituzte abiapuntu, ohi bezala osasuntsua, dibertigarria eta burutsua espero den saioan. Sarrerak jada eskura daude www.bertsosarrerak.eus atarian eta doakoak izango dira Zornotza aretoaren edukiera bete arte.
Lehen aldiz 2012an izan zen «lehia jatorra sustatzeko asmoz» eta ordutik bi taldeak zelaian aurrez aurre aritu aurreko egunetan izan da Athletic eta Realaren fundazioek martxan jarritako saioa. Ordutik urtero-urtero ikusmin garrantzitsua eragin du bertsozaleen artean. Asmoa, antolatzaileek nabarmentzen dutenez, «seguruenik, bi futbol-klub lehiakidek bien arteko lehian bizikidetza sustatzeko asmoz elkarlanean antolatzen duten kultura-jarduera bakarra izango da munduan». Bertso Derbiaren bitartez, alegia, «eskenatoki, plaza zein zelaietan bizitzen den zaletasun zintzo bezain aberasgarria sustatu nahi da».
