Ez dugu ikusten

Errusia eta Txina etsaituak egon ziren, nahiz eta bietan alderdi komunistak agintzen zuen. Gerra hotzaren garaian, Nixon eta Kissingerrek Txinarekin harremanak gauzatu zituzten, nire etsaiaren etsaia nire laguna da ideiari jarraituz. Harreman horri, eta 2001ean Munduko Merkataritza Erakundean sartzeari, etekin handiak atera dizkio Txinak. Gainera, Errusia eta Txina adiskidetu egin ziren duela 75 urte beren arteko harremanak berrezarriz. Urteurren hori ospatzeko Pekinen izan zen Putin joan den astean. Inoiz baino hobea da potentzia bien arteko harremana, eta Xi Jinping eta Putinek hitz handiak erabili zituzten bien arteko aliantza estrategikoa berresteko. Presidente txinatarra Europatik itzuli berria zen, non EBrekin dituen gorabeherak eta hartu-eman zailak egiaztatu baitzituen, baina, aldi berean, Serbia eta Hungariarekin (biak Errusiarekin harreman onekin) duen lotura sendotu zuen.

Bien bitartean, Anthony Blinken AEBko Estatuko idazkaria gitarra jotzen ikusi genuen Kieven, Ukrainako gerra Errusiaren alde mugitzen ari den honetan, eta Netanyahuk gero eta lotsagabekiroago muzin egiten dionean. Estatu Batuetan zatiketa sozio-politikoa areagotu daiteke, batez ere Trumpek irabazten badu, eta Europar Batasunean eskuin muturra eta barruko sakabanatze-joerak nabarmen indartu daitezke. Bestetik, Europaren eta AEBren ospea eta imajina oso baxu daude munduko herrialde gehienetan Gazako sarraskiaren aurrean duten jarrerarengatik. Txina eta Errusiak, berriz, Estatu palestinarraren aldeko adierazpena egin zuten. Lehengai ugariak dituen Afrikan Errusia eta Txina ondo posizionatuta daude, EB berriz ez. Duela 15 urte, AEBren ekoizpen ekonomikoa EBrena baino txikiagoa zen, eta orain ia %25 handiagoa da. Europaren beherakada azken hamarkadetan nabarmena izan da, eta buruzagi politikoek ez dute hori ikusten, edo ikusi nahi. Panorama itsusia bada ere, oraindik har daitezke gertatzen ari denaren aurrean behar diren erabaki erradikalak. Hori egin ezean, erne zabaltzen ari diren ideia antidemokratikoekin; hau da ongizatea, segurtasuna eta garapen sozio-ekonomikoa garantizatzeko demokrazia jada efikaza ez dela esaten dutenekin.