Lau astez, 'Bikia' telesail norvegiarra ETB1en

'Bikia' ('Twin', 2019) telesail norvegiarra estreinatuko du astelehen honetan ETB1ek. Ohar baten bidez jakinarazi duenez, «euskarazko fikzioaren aldekoa apustu sendoarekin jarraitzen du EITBk, eta gaueko ordutegi nagusian, 22:30ean, izango da ikusgai lau astetan zehar». Kristofer Hivyu Norvegiako aktore ezaguna da protagonista, eta bizimodu oso ezberdina duten bikien istorio kontatzen du telesailak. Bien arteko liskarraren ondoren, bikietako batek anaiaren identitatea ordezkatu beharko du.

Erik eta Adam biki berdin-berdinak dira, baina erabat muturrekoak diren bizimoduak dituzte. Erik askatasuna maite duen surflaria da; autokarabana batean bizi da, hondartza baztertu batean. Adam, berriz, familia gizona da, eta negozioetan arrakasta handia du. Ingrid emaztearekin bizi da, eta bi haur dituzte.

Zorigaiztoko egun batean, Eriken bizimodu axolagabea lehertu egingo da, eta duen guztia galduko du, istripu baten ondorioz. Erikek bizitza salbatuko du, eta Adam anaiarengana joko du, laguntza eske. 15 urte egin dute elkarrekin harremanik izan gabe, eta Adamek laguntza ukatuko dio irmo.

Elkar joka hasiko dira eta borrokaren ondorioz, nahi gabe, Erikek eta Ingridek Adam hilko dute. Istripua izan den arren, badakite errudun hartuko dituztela; Erikek orduan, kartzela ekiditeko, Adam bikiaren identitatea ordezkatuko du.

Kristofer Hivju Erik eta Adam bikien rola jokatzen du telesailean. HBOren fantasiazko 'Game of Thrones' telesail arrakastatsuan aski ezaguna egin zen Tormund Giantsbane pertsonaia gorputzean. Ingriden rola Rebekka Nystabakk egiten du. Antzerkian trebatutako aktorea da, eta hauxe da telesail batean egiten duen lehenbiziko agerraldia. Erika Calmeyerrek eta Kristoffer Metcalfek zuzendu dituzte atalak; eta Sigurd Mikal Karoliussen da ekoizle nagusia.

• Temas
• Euskal Telebista