Willis Drummond taldeak 'Hala ere' diskoa aurkeztuko du larunbatean Bonberenean
Kontzertua 22:00etan hasiko da eta sarreraren prezioa hamar eurokoa izango da
Larunbatean Tolosako Bonberenean 'Hala ere' (Tabula Rasa) diskoa aurkeztuko du Willis Drummond Iparraldeko talde ospetsuak eta lana osatzen eta garage rockaren, Seattleko grungearen eta punk britainiarraren eragin berritzailea duten bederatzi kantuez gain aurreko diskoetako kantuak ere eskainiko ditu Xan Bidegainek (baxua), Joseba B. Lenoir rek(gitarra), Felix 'Rüdiger'-ek (bateria) eta Jurgi Ekizak (gitarra eta ahotsa) osatutako laukoteak. Kontzertua 22:00etan hasiko da eta sarreraren prezioa hamar eurokoa izango da. Jada eskuragai daude aretoaren webgunean eta unean bertan ere erosi ahal izango dira.
Willis Drummonden soinuak Soundgarden edo Fugaziren 90eko hamarkadako rock zikinaren eta punkaren oihartzun urrunak islatzen ditu, nahiz eta bere abestiek estilo berezi eta paregabea izan. Kantuak zuzenak, azkarrak, astunak dira, ahots lerratu eta dardaratiarekin, oinarri erritmiko onarekin, gitarra zorrotzekin, euskarazko letra onekin eta post-rock doinuekin.
Laneko karatularen protagonista den mandarina barruan aurki daitekeenaren metafora baino ez da: krisi ekologikoa eta soziala, prekaritate-egoeraren aurreko ezintasuna eta funtzionatzen ez duen sistema etengabe zalantzan jartzea. Abesti hauek, mundua aldatzeko moduari buruzko moduak planteatu arren, hori egin nahi dutenek bizi dituzten kontraesanak aitortzen dituzte.
