2034ra arteko Euskararen Plan Estrategikoa onartu du Zumaiko Udalak

2024-2034 Euskararen Plan Estrategikoa aho batez onartu dute maiatzeko ohiko osoko bilkuran. 2024ko udazkenean abiatu zen plana osatzeko lanketa. Zumaiako Udalak AHIZE-AEK hizkuntza aholkularitza kooperatibaren laguntza izan du prozesu osoan zehar. Eusko Jaurlaritzak ezarritako AROA marko estrategikoaren baitan egindako prozesu honek diagnostiko bat egin zen lehenengo; herriko hainbat eragile eta norbanakoren parte hartzea ere jaso zen bertan. Beranduago parte hartze saio irekiak egin zituzten. Lanketa horretatik ateratako emaitza da plana.

Plan berriak hurrengo hamar urteetarako Zumaiako hizkuntza politika zehazten du, ikuspegi estrategiko eta komunitario batetik. Helburua da euskararen erabilera sustatzea, arlo guztietan (administrazioa, hezkuntza, lan mundua, aisialdia…) eta herritarren arteko elkarlana eta kontzientziazioa indartzea.

Aitor Manterola zinegotziak osoko bilkuran dokumentua onartu arte prozesuan zehar eman diren pausoak gogorarazi zituen maiatzeko plenoan.

Prozesua 2024ko irailean hasi zen. Orduan, «Zumaian euskararekin zer?» galdera luzatu zien Udalak herritarrei, datozen hamar urteetarako euskara plana diseinatzeko prozesuari hasiera emateko asmoz.

Hiru urrats nagusi izan ditu: irailean herritarrek galdetegi bat bete behar zuten, eta Manterolak gogorarazi zuen prozesuak parte-hartze handia izan zuela beste udalerri batzuekin alderatuta. Izan ere, 284 lagunek erantzun zioten galdetegiari. Urrian taldekako saioak egin zituzten; guztira, bost lan-mahai eratu ziten: hezkuntza eta familia, kirola, kultura eta aisialdia, merkataritza eta ostalaritza, eta Oikia. Era berean, profil desberdinak dituzten pertsonei banakako elkarrizketak egin zitzaizkien eta DBH3 eta Batxilergoko ikasleei zuzendutako inkesta bat ere egin zen. Eta azken fasean, azaroan, parte-hartzaile guztiak azken batzar batean elkartu ziren.

Lanketaren ondorioak mar-txoan aurkeztu ziren, 'Euskararen aroa Zumaian. Datozen 10 urteetarako gakoak' izeneko saioan, 'Euskara, bestela ez gara' hitzaldi zikloaren baitan. Beraz, herri-ariketa kolektiboak oinarri ona duela nabarmendu zuen zinegotziak, bizilagunen eta herriko eragileen iritziak jasotzen baititu euskararen erabilaren inguruan. Zumaia euskal hiztun eta aktiboak dituen herria izatea nahi da, euskararen erabilera handitzeko. Dokumentuan jasotakoaren arabera, euskararen mahaia eratuko da, eta horren barruan hainbat bilgune sortuko dira: transmisioa, kirola eta kultura. Bilguneak eragile desberdinek osatuko dituzte, udaleku sailek, Larraina elkarteko kideek, eta kasu batzuetan UEMAk ere.

«'2024-2034 Euskaren Plan Estrategikoa gobernu-taldeak bere gobernu-planean aurkeztutako beste ekimen eta programetako bat da. Dagoeneko gauzatu dugu, eta orain martxan jartzea besterik ez da falta», adierazi zuen euskara zinegotziak, eta plana bost urtean behin berrikusiko dela gaineratu zuen.

Bestalde, euskararen erabilera bultzatzeko eta sensibilizatzeko Udalak egindako ekimenak ekarri zituen gogora Manterolak. Besteak beste, Zumaiako euskararen historia soziala jasotzen duen ikus-entzunezkoa aurkeztu (Bihardugu elkartearekin batera); hitanoa ikasteko eta praktikatzeko Appa hi! aplikazioaren Zumaiako bertsioa; Herriko ikastetxeei baliabideak eta programak eskaini bertsogintza, antzerkia, literatura eta soziolinguistika lantzeko...etab. «Euskara plan berriak horrelako ekimenak jasoko ditu. Horientzat guztientzat herriko hainbat eragileren laguntza eta euskararekiko ardura izango dugu. Gure helburu eta ardura da euskara babestea eta erabilera indartzea bizirik jarrai dezan, desagertzeko arriskua baitu. Gauzak horrela, guztion ardura izango da 2034ra arteko Euskararen Plan Estrategikoa aurrera eramatea», gaineratu zuen Aitor Manterolak.

• Temas
• Zumaia