'Sañu bizirik' mantentzeko deia egin dute hainbat herritarrek

Sañu Bizirik, Errezil Bizirik eta Oletan ere Ez! taldeek, Txillarramendi auzo elkarteak, Lagun Onak, Anaitasuna eta Agiro mendizale klubek eta Sokaitz eskalada taldeak deituta Sañu Eguna izan zen igandean. Eguraldi makurra izan bazuten ere, hainbat lagun elkartu zen Sañoa gainean, Statkraft enpresak Piaspe proiektu eolikoa gauzatu nahi duen eremuan. Salda eta pintxoez gozatzeaz gainera, bazuen elkarguneak beste helburua: mendietan eolikorik ez dutela nahi aldarrikatzea, hain zuzen ere. Orain arte proiektuaren inguruan eman diren pausoak eta aurrera begira geratzen direnen berri eman zuten. Izan ere, erakundeetatik harago, «argi daukagu tokian tokiko jendearen ekimena dela txikizioaren aurkako eta lurraldearen defentsarako borrokaren muina», esan dute.