Gipuzkoako artxibo nagusietan barneratzeko aukera paregabea

Artxiboen Nazioarteko Astea ekainaren 9tik 13ra ospatuko da 'Artxibo eskuragarriak. Artxiboak denontzat' lelopean. Artxiboen Nazioarteko Kontseiluak (ICA) babestuta. Ospakizun hori dela eta, Gipuzkoako Foru Aldundiko artxibo historikoek —Gipuzkoako Artxibo Historiko Probintzialak, egoitza Oñatin duenak, eta Gipuzkoako Artxibo Nagusiak, Tolosan — bat egin dute ekimenarekin, eta ate irekiko jardunaldiak antolatu dituzte bisita gidatuen bidez. Helburua, herritarrei eguneroko lana, lan-espazioak eta gordetzen dituzten dokumentu baliotsuak hurbiltzea da, izan ere, hori da Artxiboen Nazioarteko Asteak aldarrikatzen duena, artxiboek espazio ireki, inklusibo eta herritar guztien zerbitzura dauden espazio gisa duten eginkizuna, mundu osoko publikoengana iristeko gai direlarik.

Gipuzkoako Artxibo Historiko Probintzialean (Oñati) ekainaren 9an eta 10ean egingo dira bisitak; Gipuzkoako Artxibo Nagusian (Tolosa), berriz, ekainaren 11n eta 12an. Bietan, hiru bisita gidatu eskainiko dira eguneko: bi goizez (10:00etan eta 12:00etan) eta bat arratsaldez (16:00etan). Bisita bakoitzean bi talde paralelo egongo dira, bata euskaraz eta bestea gaztelaniaz, eta gehienez ere 15 pertsona izango dira talde bakoitzeko. Gutxi gorabehera, ordu eta erdi iraungo dute.

Ibilbideak aukera emango du artxiboetako hainbat espazio hurbiletik ezagutzeko, baita normalean bisitatzen ez direnak ere, hala nola dokumentu-gordailuak, lan-gelak edo zaharberritze-tailerra. Gainera, XV. mendetik XX. mendera bitarteko jatorrizko dokumentuak ikusi ahal izango dira, horietako asko Gipuzkoarako balio historiko handikoak.

Parte-hartzea doakoa da, baina aldez aurretik erreserba egin behar da. Interesdunek 943 41 50 60 telefonora deituta eman dezakete izena (astelehenetik ostiralera, 8:30etik 14:30era), edo ahpg-gpah@gipuzkoa.eus helbide elektronikora idatzita.

• Temas
• Oñati
• Tolosa