Udaberri koloretsua ireki dute Seguran

Aurtengo 22. edizioa beste urte batez lore eta landare zaleen elkargune bilakatu da, bai eskualdetik zein kanpotik iritsitakoentzat. Haur zein helduak gustura aritu dira postuz postu betiko loreak eta berritasunak ezagutuz. Kolore eta gustu guztietarako landareak aurkitu zitezkeen Segurako plazan: balkoi, lorategi edota baratzerako, bertakoak edota kanpokoak, oparitzeko, baita fruta arbolak eta baratzerako tomate, tipulina, zein bestelakoak.

Hamaika hazitegik jarri dute postua, gehienak gipuzkoarrak, eta goiz guztian geratu gabe aritu dira Segurara gerturatu direnen galderak eta eskaerei erantzuten. Ohi bezala, barietate ezberdinetako geranioak aurkitu zitezkeen ia postu guztietan, baina horrekin batera, ikusleen begiradak jaso zituzten krabelinek, alegriek, orkideek, larrosek edota diplademiek, esaterako.

Era berean, Josu Osa adituak, fruta arboletan txertaketak egiteko modu ezberdinak azaldu zituen.

Haurrek kaktus eta marrubi landareetarako joera erakusten zuten bitartean, lorez betetako margarita eta diplademia eta larrosetara zihoazen helduen begiradak. Landareak hazten ikustea gustatzen zaienek ere, izan zuten barietate ugariren hazi ekologikoak erosteko aukera. Goiz guztian landare askorekin joan etorri ugari izan ziren autoetara, herria bisitatzeko tartea hartu aurretik.

Eliza ondoko frontoi zaharrean ere giro ederra izan zen eskualdeko artisauen produktuen eta Euskal Herriko ekoizleen azokarekin, elikagai zein artisautza lanekin. Gazta, bitxiak, marmelada, tartak, eztia, jantziak, ilustrazioak, ukenduak… erosi ahal izan ziren. Bereziki lanpetuta egon ziren Segurako talogileak, jende ilada luzearekin. Gainera, Kriseilu txistulari taldea goiz osoan aritu zen herriguneko kaleak musikaz alaitzen.