Emakumeak Kongresua urtarrilaren 17tik 20ra izango da Bilbon

Emakumeen ikusgarritasunaren eta berdintasunaren alde lan egiteko bidean aurrerapausoak eman behar direla argi utzi du Emakumeak Biltzarrak eta, hala, kongresua antolatu du urtarrilaren 17tik 20ra Bilbon agenda feministari, ekonomia feministari edo askatasun afektibo-sexualari buruz gogoeta egiteko.

Topaketa Euskalduna jauregian izango da eta antolatzaileek argi utzi dutenez gizonei ere irekia izango da, hori bai, «protagonismoa emakumeena» izango dela nabarmenduz. Besteak beste leku askotako emakumeekin izandako eztabaida eta hausnarketak izango dira.

Kongresura 30 emakume baino gehiago gonbidatu dituzte, profil anitzetakoak: pentsalariak, artistak, kazetariak, irakasleak eta aktibistak. Besteak beste parte hartuko dutenen artean izango dira Frantziako ministro ohia eta Piotu-Charenteseko Eskualde Kontseiluko egungo presidentea dena, Segolene Royal; Fawzia Koofi, Afganistango politikaria eta ekintzailea; Ana Pelaez, Emakumearen aurkako Bazterkeria Ezabatzeko Nazio Batuen Batzordeko buruordea; Cecilia Castaño, Politika Zientzietako doktorea eta Ekonomia Aplikatuko katedraduna; Ana de Miguel, Filosofia Moraleko irakaslea. Euskaldunei dagokienez, berriz, honako hauek izango dira: Ane Legarreta, orkestra-zuzendaria; Elena Arzak, sukaldaria; Izaro Andres abeslaria; eta Nerea Ibarzabal eta Onintza Enbeita bertsolariak.

Ekimenaren bitartez «konpromiso feminista berritu» nahi dute eta horretarako beste zenbait espazio ere izango dira azken hiletako lana ikusteko eta baita liburutegi feminista ere.

• Temas
• Emakumeak