Politikari gaixoa

Hasi zen gizona bere adierazpenak egiten kazetari ugariren aurrean, serio, mantso, etxetik ekarritako hitz neurtuak irakurriz eta hasieran bertan esan zuen bakarka etorri zela agerpen horretara, inoren laguntzarik gabe, ez idazkari, ez aholkulari, ez gidari, guztiz bakarka, bere auto pribatua gidatzen.

Drama baten doinuaz aipatu zuen hori eta horrek harritu ninduen. Nola uste du diputatu horrek bizi garela gehienok? Agian ez du horren berri, baina bakarka goaz edonora, ez dugu idazkaririk, balizko aholkulariak borondatezkoak dira (boluntarioak, ez peseteroak), ez ditugu soldatapean. Batzuk ez dute autorik eta ez dut gidaria duen inor ezagutzen. Kontuan izan Ábalos ez zela ministroen-tzat hizketan ari, edonorentzat baizik.

Badakit askori merkeegia irudituko zaiola baieztapena, baina iruditzen zait Ábalos jaunaren adierazpenek froga-tzen dutela zeinen urrun bizi diren kaletik politikari asko. Irakurri dut oraindik diputatu den gizon horrek berrogei urte daramala diru publikoaren babesean bizitzen eta horrek esplika dezake zergatik iruditzen zaion dramatikoa gainerako gehienontzat egunerokoa dena.

Joan den astean Bilbon eman nuen hitzaldiaren atarian ez zitzaidan burutik pasa Bilbora bakarka eta garraio publikoan joan nintzenik esatea, ezta aholkularirik edo idazkaririk gabe egin nuela azaldu nuen lana. Ez naiz inondik ere politikarien aurkako salaketa merkeak egiten ari. Jakin badakit beharrezko zaizkigula. Baina eskertuko nieke epika gutxiago erabiliko balute. Horregatik ez zait gustatzen halako politikoak aurrerantzean honetan edo hartan larrua utziko duela entzutea. Halakoari esan nahi nioke larrua soinean duela nahi dugula, osorik eta, ahal dela, orekatu xamarra. Ez sakrifikatu hainbeste, hori egiten duenak azkenean emandakoa kobratu nahi izaten duelako. Hainbeste lan egin dut zuen onerako, gau eta egun eta orain bakarka etorri behar izan dut zuen aurrera. Zeinen esker gaiztokoak zareten.

Hor ibiliko da Ábalos gaixoa egunotan, bakarka, baztertua, idazkaririk edo aholkularirik gabe, bere auto pribatuan batetik bestera. Isildu zaizkio mariatxiak.