Gazteek etxebizitzaz duten iruditeria aztertzeko lehiaketa

Gazteek, genero ikuspuntua abiapuntu, etxebizitzaren iruditeria sozialaren eta iruditeria horren arrakalen inguruan dituzten sentimenduak, gogoetak eta ikuspuntuak azaldu ahal ditzaten, hauen bueltan hausnarketa sustatzeko eta, batez ere, diagnosia eratzeko, Euskadiko Gazteriaren Kontseiluak (EGK) 'Etxearen erraiak' arte-lehiaketa martxan jarri du. Epea uztailaren 18an amaituko da.

Lehiaketan parte hartzeko, etxebizitzaren iruditeria sozialaren inguruko lanak jasoko dira, edozein adierazpide artistikotakoak: poema bat, testu narratibo bat, bertso bat, ilustrazio bat, argazki bat… Zehazki, genero ikuspuntua aintzat izatea baloratuko da, eta etxeak ezkuta ditzakeen biolentiza mota ezberdinei erreparatzea. EGK-k adierazi duenez «izan ere, etxea norbanakoei gure bizitzak garatzeko espazioa eta aterpea eskaintzen digun egitura den arren, biolentziaren gotorleku ere izan daiteke».

Jasotako lamam artetik hautatuak irailaren 12an iragarriko dira, eta irailaren 25ean egingo da sari-banaketa Donostian egingo den ekitaldi batean.

Informazio gehiago nahi izanez gero, 615749929 (Leire) edo 688737092 (Maddi) zenbakietara dei daiteke, zein berdintasuna@egk.eus edo etxebizitza@egk.eus helbideetara idatzi.

Ez da gazte-elkarteen plataformak etxebizitzari buru abian jarritako ekimen bakarra, Euskadin gazteek emantzipatzeko eta etxebizitza duina izateko dituzten zailtasunak agerian uzteko asmoz 'Nork-nori-zer: diskriminazioa alokairuan' antolatu baitu «xenofobia eta arrazakeria egoerak dokumentatu eta salatzeko» asmoz etxebizitzen eskaintzan, bai errentatzaileen eta higiezinen agentzien jarreran ere.

«Alokairu kuota altuak, soldata baxuak eta etxebizitza eskasia gazteek modu autonomoan bizitzeko gainditu behar dituzten oztopoetako batzuk dira», salatu dute.

• Temas
• Euskadiko Gazteriaren Kontseilua (EGK)