Bertsozaletasuna hizpide, 'Hitzetik Hortzera'n

Bertsozaletasunaz egindako ikerketa soziolinguistikoa izango dute hizpide Harkaitz Zubiri ikertzailearekin eta Bertsozale Elkarteko Beñat Gaztelumendirekin eta Miren Artetxerekin

Bertsozaletasunari buruz egin den ikerketa soziologikoaren emaitzei buruz hitz egingo dute igande honetan 'Hitzetik Hortzera' saioan Harkaitz Zubiri ikertzailearekin eta Bertsozale Elkarteko zuzendaritzako kideak diren Beñat Gaztelumendirekin eta Miren Artetxerekin.

Gaurkoa aztertu etorkizuna ziurtatzeko, horixe egin du bertsolaritzak. Bertsozale Elkarteak Mintzola Ahozko Lantegiaren bidez gauzatu du ikerketa eta igandeko programan ikerketaren emaitzei buruz mintzatuko dira. Horretarako, Harkaitz Zubiri ikertzailearekin elkartuko dira. Bertsolaritza nola ikertu duten galdetuko diote eta gaur egungo bertsozalearen profila zein den ezagutuko dute.

Egina dago ikerketa eta zabaldu dira emaitzak, baina zer egingo du orain Bertsozale Elkarteak? Pauso horiei forma emateko bidea azalduko dute elkarteko zuzendaritzako kide diren Beñat Gaztelumendik eta Miren Artetxek. Ikerketa soziologikoak egitea zergatik den interesgarria eta etorkizunerako detektatu diren erronkei buruz galdetuko diete.

Ba al du bertsolaritzak gizartea nolabait aldatzeko gaitasuna? Desagertuko al da bertsolaritza? Horiek eta beste hainbat galderen erantzunak, igandeko 'Hitzetik Hortzera'n.

Bestalde, Amurrion, Txapelketa Nagusiko finalisten bertso jaialdia izan zen, eta igandeko programan hango bertsoaldi onenak entzungo dira. Kantuan izango dira Aitor Mendiluze, Aitor Sarriegi, Amets Arzallus, Beñat Gaztelumendi, Igor Elortza, Jon Maia, Maialen Lujanbio eta Sustrai Colina. Gainera, Errege Egunez Ondarroan izan zen Gabonetako bertso saioko bertsoaldiak ere ekarriko dituzte. Oholtzara igo ziren Aitor Mendiluze, Andoni Egaña, Maddalen Arzallus eta Miren Artetxe.

Hori dena, igandean, 15:00etan, ETB1en.

Temas

Euskera
 

Fotos

Vídeos