Azpeitia

Liburutegien Nazioarteko Egunaren harira, hainbat ekintza Azpeitian ere

Ostiralean, urriaren 24an, Liburutegien Nazioarteko Eguna da. Horren harira, hainbat ekintza antolatu ditu Azpeitiko udal liburutegiak ere. Honakoak dira hurrengo asterako antolatu direnak: Astelehenean, HH 4. mailako ikasleei zuzendutako ipuin kontaketa saioa eskainiko du Manex Beristainek, 17:30ean. Saioa doakoa izango da, baina aurrez izena eman beharko da parte hartu ahal izateko: ostirala izango da horretarako azken eguna.

Asteartean, LH 1. mailako ikasleentzako eskulan tailerra egingo dute, 17:30etik aurrera. Plazak mugatuak izango dira, eta aurrez izena eman beharko da.

Azkenik, LH 3. mailatik LH6. mailara arteko ikasleek Irakurleen Txokoaren hitzordua izango dute hilaren 29an, asteazkenean, 17:30ean.