Hondarribia

Herriko gazteek modu ludikoan ezagutu ahal izango dute arrantza sektorea

Artisau-arrantza udalerriko gazteei hurbiltzeko proiektua martxan jarri dute Kofradia-Itsas Etxea, Done Pedro Itsas-Gizonen Kofradia eta Hondarribiko Udalak. Hiruen arteko lankidetza sendotu egin da 'Izan Arrantzale programaren aldeko apustu berri batekin'. Artisau-arrantzaren belaunaldien arteko erreleboa sustatzea eta sektore estrategiko hori gazteengana hurbiltzea dira ekimen honen helburuak.

'Izan Arrantzale' Gipuzkoako Baxurako Arrantza Ekoizleen Erakundearen (Opegui) ekimena den Kofradia-Itsas Etxeak bultzatutako proiektu estrategikoa da. 6 eta 17 urte bitarteko gazteei zuzenduta dago eta adin tarte bakoitzari egokitutako azpiprograma desberdinetan egituratzen da (Izan Arrantzale Kaiatik, Izan Arrantzale Barkutik, Arrantza ikustera goaz!, etab.), beti ere kofradiak bilgune eta ikastoki izanik.

Hondarribian, urtebeteko elkarlanaren ostean, hiru erakundeek arrantza sektorearen presentzia sustatzen jarraitzen dute, haur eta nerabeei zuzendutako hezkuntza jardueren bitartez. 'Izan Arrantzale' Gabonetan eta Aste Santuan STEAM trebetasunak garatzen espezializatuta dagoen GazteTEK programan sartu zenetik, proiektua tokiko hezkuntza- eta kultura-agendan protagonismoa hartuz joan da.

2024ko martxoan proba pilotu bat egin zen, Gaztelekuko bazkide diren 13 eta 16 urte bitarteko 9 gaztek osatutako talde batekin. Horiek arrantzaleen kofradia bisitatu zuten eta, ondoren, jarduerari buruzko ikuspegia eman zuten, baita arrantzaren munduari buruz jorratu eta ikasi nahiko lituzketen edukiei buruzkoa ere. Euren iritziak kontuan hartuta, Kofradia-Itsas Etxeak proposamen berezia egin zuen, eta Udaleko Gazteria sailarekin batera, 2024-2025 bitarteko gabonetan, 'Izan Arrantzale' Hondarribian jarri zuten martxan.

Uztailean zehar, 'Izan Arrantzale' Gazteriako udalekuetan egokitu eta txertatuko da. Oraingo honetan, herriko neska-mutilek Done Pedro Itsas-Gizonen Kofradia bisitatuko dute eta modu ludiko eta parte-hartzailean ezagutu ahal izango dute arrantza-sektorearen benetako jarduera: espezieak eta sasoiak, arrantza-tresnak, ontziko bizitza... Hori guztia, udalerriko nortasunaren funtsezko zati den ogibide tradizional eta jasangarri horrekiko interesa pizteko diseinatutako jokoekin, itsasoko eskulanekin eta arrantza-tailerrekin konbinatuta.

Ekimen honen bidez, Kofradia-Itsas Etxeak, Done Pedro Itsas-Gizonen Kofradiak eta Hondarribiko Udalak euskal itsasertzaren garapen jasangarriarekin duten konpromisoa berresten dute, hezkuntzaren alde eginez eta belaunaldi berriei ezagutzak transmitituz.