Modari esker denboran bidaiatuz
Errenteriako Jantziaren Zentroan batetik, 'Belle Époque' garaira hurbiltzeko aukera dago udako erakusketaren eskutik
Bidaiatzeko aukera asko daude gaur egun. Uda izanik, askok dagoeneko probestu dituzte euren opor egunak, beste asko hasteko egongo dira, baina izango dira bertan gelditzen ... direnak ere eta horientzat bestelako bida bat egiteko proposamena luzatzen die Errenteriako Jantziaren Zentroak. Udako erakusketa berezia zabalik dute bertan dagoeneko eta honek, denboran bidaia eginez, Belle Époque garaira darama ikuslea. XIX. mende amaieratik Lehen Mundu Gerra arteko urteak dira, garai honetan klase sozial berria sortu zen, burgesia, honek aisia eta entretenimendua sustatu zituen. Erakusketan gauez zein egunez emakumezkoek erabiltzen zuten janzkera ezagutuko dugu, berariaz sortu diren errepliken bidez.
Batetik, gauez,1887ko uztailean zabaldu zen Donostiako Kasino Handiko festa batean murgiltzeko aukera ere egongo da. Zortzi emakume-jantziren erreplikak dira, guztiak lurreraino iristen diren gona luzeak dituzte, amaitzear den estilo edo moda baten azken urteak dira.
Bestetik, egunez, emakumeak kirola praktikatzen hasi ziren. Erresuma Batuan sortu ziren kirol gehienak eta horietarako erabili beharreko jantziak. Zaldiketa, ziklismoa, automobilgintza, tenisa eta itsas-bainurako erabiltzen zituzten bloomer galtzak, amazona jantzia, zein 1860 hamarkadan bainurako sortutakoa. Jantziez gain, testuak sortu dira erakusketarako, emakumeak kirol horiek praktikatzeko izan zituzten zailtasunen berri emanaz.
Belle Époque erakusketa Kapitain-Etxearen sarreran doan ikus daiteke urriaren 27ra arte.
Erakusketa iraunkorra
Beste aukera ederra ere eskaintzen du Jantziaren zentroak. Bigarren honetan, M/Boda izeneko erakusketan, 16 ezkongai-jantziren bidez emakumezkoek ezkontzarako erabili duten jantziaren 150 urteko bilakaera ezagutuko dute bertaratzen direnek.
Areto nagusian 13 ezkontza-jantzi, guztiak zuriak edo beix kolorekoak. 1840-1988 urte artekoak dira. Jatorriari dagokionez, bat Donostiakoa da, 1958 urtekoa hain zuzen ere, gainerakoak Frantzia, Kanada, Estatu Batuak, Erresuma Batua, Italia eta Espainiakoak.
1880-1920ra bitartean emakumeek ezkontza soinekorako kolore beltza erabili zuten, bi arrazoi tarteko. Bata, dolua, bestea, sen ona. Garai horretan jantzi gutxi zituzten eta probetxua ateratzen zieten hamaika bider jantzita.
Aretoaren kanpoaldean garai horretako hiru ezkontza jantzi beltz egongo dira ikusgai. Guztiak Euskal Herrikoak dira, Jantziaren Zentroak dohaintzan jasotakoak, Gasteiz, Leitza eta Ordiziako jantziak.Bigarren solairuko erakusketa XVIII. mendean abiatzen da, eta 1960 urtean amaitu. 20 jantzi dira, modak historian izan duen garapena eta aldaketa ikus dezakegu aretoan. Ikusgai dauden jantzien artean, kalerako erabilitako bi jantzi berezi aipatu daitezke, bata. «bisita» izenekoa. Manilako mantoiaren antzerako oihalarekin egindako jantzia, bestea, operara joateko berokia.
Aretotik ateratzerakoan eta bisitari amaiera emanez, Cristobal Balenciagaren Eisa etxeko 50-60 hamarkadetako sei jantzi eta hainbat buruko ikusi ahal izango dira.
Bisita gidatuak
Jantziaren Zentroak udan bi bisita berezi eskainiko ditu, 7 euroren truke (pentsiodunak 6 euro).
Lehenengoan, Lola Horcajo historialariak Donostiako Belle-Epoque garaia azalduko du. Bisita uztailaren 13an, larunbata, arratsaldeko 18.00etan izango da.
Bigarrenean, Jantziaren Zentroaren erakusketa iraunkorrera bisita egiteko aukera egongo da uztailaren 14ean eta abuztuaren 25ean, 12.00etan.
Bisita horietan parte hartu ahal izateko aurrez izena eman behar da, sarrera kopurua mugatua baita, jantziarenzentroa@errenteria.eus postara idatzi ala Errenteriako Turismo bulegora deituta 943 494 521.
¿Tienes una suscripción? Inicia sesión
