Jaurlaritzak 72 milioi euro bideratuko ditu unibertsitatez kanpoko hezkuntzako beketara

Eusko Jaurlaritzak eutsi egingo die seme-alaben unibertsitatez kanpoko hezkuntzari aurre egiteko familien gastuak ordaintzeko laguntzei, 72 milioi euroko inbertsioarekin. Deialdia Jaurlaritzako gobernu bileran onartu du astearte honetan, Hezkuntza Sailak proposatuta.

Jaurlaritzatik azaldu dutenez, aurreko ekitaldiarekin alderatuta, datorren ikasturtean bekak jasoko dituzten familia gehiago izango dira, izan ere Hezkuntza Sailak aldatu egin ditu hezkuntza premia berezietako ikasleei laguntzeko sarbide atalaseak. Hortaz, aurten bideratutako zenbatekoa lau milioi euro handitu da. Beketarako sarbidea bermatuta dago baldintzak betetzen dituzten familia guztientzat.

Deialdia Euskal Herriko Agintaritzaren Aldizkarian (EHAA) argitaratu eta hurrengo egunetik aurrera eskatu ahal izango dira laguntzak, seguru asko uztailaren 22tik irailaren 30era arte, hain zuzen ere.

Haur Hezkuntzatik hasi eta goi mailako heziketa zikloetaraino eskatu ahal izango dira bekak: Haur Hezkuntza, Lehen Hezkuntza, Derrigorrezko Bigarren Hezkuntza, musikako eta dantzako oinarrizko irakaskuntzak, Batxilergoa, Lanbide Heziketako erdi mailako eta goi mailako zikloak, arte irakaskuntza profesionalak, kirol irakaskuntzak, hizkuntza irakaskuntzak hezkuntza administrazioaren titulartasuneko eskola ofizialak eta Oinarrizko Lanbide Heziketako zikloak.

Beken deialdien helburua ikasle guztien hezkuntzarako eskubidea bermatzea da, muga ekonomikoak edo desorekak konpentsatuta, hezkuntzarako sarbidea berdintasun egoeran izan dezaten. Bekek hiru osagai hauetako bat edo batzuk izan ditzakete: kuota osagaia, eskola materialaren osagaia eta jantoki osagaia.

Azken ikasturtean 112.170 ikasle izan ziren beka hauen onuradun.

• Temas
• Eusko Jaurlaritza