Euskal ikus-entzunezkoaren talentu berrien topaketa

Talentuaren Guneak hirugarren edizioa burutuko du ostiralean Arabako Teknologia Parkean. Topaketak euskal ikus-entzunezkoen sektorean sortzen ari den talentuari ikusgarritasuna ematea du helburu. Zineuskadik sustatzen du ekimena eta bertan izango dira, besteak beste, Mar Izquierdo Zineuskadiko koordinatzailea, eta Ione Feijoo, marketin, komunikazio eta Basque.Audiovisual. markaren nazioarteko garapenaren arduraduna.

Talentuaren Gunea ahots eta narratiba berrien bila dabiltzan ekoiztetxeen eta industrian lehen urratsak ematen ari diren talentu gazteen arteko topagune gisa sortu zen. Pitching saio hauen baitan, sortzaileek lantzen ari diren proiektuak aurkezten dituzte, beren ideiak sektoreko profesionalekin partekatuz. Jardunaldian zehar, hautatutako 14 proiektuen taldeek beren lanak erakutsiko dituzte epaimahai espezializatu baten eta bertaratutako publikoaren aurrean,

Hirugarren edizio honek Talentuaren Gunea sortzaile gazteen, ekoizleen eta sektoreko eragileen arteko topaketarako funtsezko gune gisa sendotzen du, ahots berriak bultzatzeko eta Euskadiko ikus-entzunezko ekosistemaren barruan sinergiak sustatzeko helburuarekin.

Antolatzaileek azaldu dutenez, aurreko edizioetan bezala, Zineuskadik «lan aktiboa» egin du euskal zinema-eskolak eta unibertsitateak inplikatzeko, eta ikasleak animatu ditu ekimen honetan parte hartzera, sektoreko profesionalen aurrean beren proiektuak aurkezteko aukera ematen baitie.

Gainera, proposamenak baloratu eta generoen arabera banatutako sariak emango dituen nazioarteko epaimahai bat ere izango da jardunaldi honetan.

• Temas
• Zinema