Apirilaren 21ean zabalduko da Ondarearen Europako Jardunaldietan antolatuko diren proposamenak aurkezteko epea

Ondarearen Europako Jardunaldiek ondare bizia izango dute ardatz. 'Ondarea bizirik! Patrimonio vivo' lelopean, Gipuzkoako Foru Aldundiko Kultura Departamenduak gonbita luzatu die herritarrei, ondarearen kontserbazioarekin, transmisioarekin eta balioespenarekin zerikusia duten ekitaldiak antolatzeko proposamenak egin ditzaten. Hauek aurkezteko epea apirilaren 21ean zabalduko da.

Ekimen honen jarduerak urrian hasiko dira. Jardunaldiek aurten, gure ondarea bizirik mantentzeko modu desberdinak aztertzera gonbidatuko dute: artisau-lanbideen bidez, kontserbatzeko eta zaintzeko tekniken bidez, zaintzen duten komunitateen bidez eta, batez ere, transmisioaren bidez.

Proiektu honetan ondarea zabaltzeko erabiltzen diren formatuak askotarikoak izaten dira. Horrela, programan formatu desberdinetako jarduera ugari sartuko dira: gymkhanak, bisitak normalean sartu ezin diren lekuetara, bisitak azalpenekin, solasaldiak, kontzertuak, erakusketak, tailerrak eta abar.

Jardunaldiaren aurkezpenean Kultura diputatuak, María José Telleriak, ziurtatu zuenez, «kultura ondareari buruzko jardunaldiek balio digute kultura bizikidetzarako esparru gisa ospatzearen balioa eta garrantzia aldarrikatzeko. Orainari begiratzeko, oraindik bizirik dauden tradizio zaharren garrantzia aitortuz; lanbideak baloratzeko, inoiz baino hobeto dakigunean oso garrantzitsua dela horiek kontserbatzea; eta arte eszenikoen izaera iragankorraz eta garrantzitsuaz gozatzeko. Europako Jardunaldien edizio berri honek kultura bizitzeko eskaintzen dizkigun aukerak dira».

Programan parte hartuko duten jarduerak Gipuzkoa Kultura webgunearen bidez proposatu ahal izango dira apirilaren 21tik ekainaren 1era bitartean. Proposamenak edonork egin ditzake, entitateek, taldeek, enpresek edo norbanakoek, betiere horien xedea bada ondarea ezagutarazteko eta jaso dugun herentzia hori eta gure nortasuna osatu duen hori deskubritu eta gozatzera gonbidatzeko jarduera bat antolatzea. Gainera, apirilaren 17an, astelehena, jardunaldietan parte hartu nahi duen edonorentzat irekia den bilera bat egingo da Koldo Mitxelena Kulturunean, non zehatz-mehatz azalduko den ekimena, eta jarraibideak eta ideiak emango dira.

Ondarearen Europako Jardunaldia Europako Kontseiluak sustatzen duen programa bat da, eta Gipuzkoako Foru Aldundiko Kultura Departamentuak antolatzen du, Arabako eta Bizkaiko foru aldundiekin eta Eusko Jaurlaritzarekin lankidetza estuan.

• Temas
• Euskera
• Zabalik