Legorreta

'Harrotasunaren Txokoa' estreinatuko da gaur liburutegian

Udal Liburutegiak 'Harrotasunaren Txokoa' izeneko gune berezi bat prestatu du gaurko egunez ospatzen den LGTBIQ+ Harrotasunaren Eguna dela eta. Ekimen berritzaile honen helburua da ikusgarritasuna eta aniztasunarekiko errespetua sustatzea, irakurketaren bidez.

Txoko honetan LGTBIQ+ kolektiboarekin loturiko komikiak, eleberriak eta jakintza liburuak aurki ditzazkete herritarrek. Haur, gazte zein helduentzako materiala bildu da, eta gaia modu ulergarrian eta askotariko ikuspegietatik jorratzen duten lanak dira denak, interesa duen edonork modu ezberdinetara gaiaz gehiago ikasteko.

Uztailaren erdira arte egongo da erabilgarri txokoa liburutegian, eta bertako liburu guztiak maileguan hartzeko aukera ere egongo da. Horrela, liburutegiak bat egin du aniztasun sexual eta afektiboaren aldeko aldarrikapenarekin, kultura eta hezkuntza tresna gisa erabiliz.