Legorreta

Dena martxan da Azintzio jaiez gozatzeko

Atzo arratsaldean eman zitzaien hasiera Legorretako Azintzio jaiei eta estreinua, ezin hobea izan zen. 18:30ean Legoreggae taldeak jaurtitako suziriak emandako txupinazoarekin lehertu zen festa, eta Pikua udaletxeko balkoian jarri zen, han izango baita jaien amaierara arte. Txikientzako puxikak, litxarkeriak eta goxokiak banatu ziren hasiera alaitzeko, eta hainbat gazte gerturatu ziren hauetaz gozatzera. Ondoren, erraldoiak eta buruhandiak kalez kale ibili ziren, eta bertsozaleek ere ezin izan zuten gehiago eskatu: Aitor Sarriegik eta German Urteagak, Julio Soto eta Maialen Akizuren aurka jardun zuten bertso erronka bizian, Imanol Artola 'Felix' gai-jartzailearekin. Eguna lagunarteko afariarekin eta DJ Track-en kalejirarekin borobildu zen, festa giroak gaueko ordu txikiak arte iraun zuelarik.

Gaur, osteguna, Azintzio eguna ospatuko da eta berriro ere herria musikaz eta ospakizunez beteko da. 13:00etan zumba herrikoia izango da plazan, eta partaideentzat salda banatuko da. Arratsaldean berriz, 18:15ean, euskal erromeria, Herriko Irrintzi Alai dantza taldearen emanaldia eta sokadantza izango dira.

Horrez gain, sagardo dastaketa eta txorizo jana izango dira lagun. 20:00etan Pikukada batukadak erritmoa jarriko du kaleetan, eta 23:00etan helduen danborrada iritsiko da Joselontxos txarangaren laguntzaz.

Festa ez da geldituko eta gaur ere, herritarrek eta bisitariek giro apartaz gozatzeko aukera izango dute.