Ibarra

Astronomia ikastaroa emango du Aranzadi Zientzia elkarteak maiatzean

Gauean zerura begiratu eta izarrak zein konstelazioak identifikatzen saiatzea denborapasa ohikoa da udako gau oskarbietan. Horrela, Aranzadi Zien-tzia elkarteko Astronomia saileko kideek ikastaroa emango dute Ibarran maiatzean. Lau saioko tailerra izango da eta parte hartu nahi dutenek bihartik aurrera izena eman dezakete Kultur Etxean. Ikastaroa hamasei urtetik gorako pertsonei zuzendua dago. Informazio gehiagorako 943.670.399 telefonora deitu daiteke.

Teoria eta praktika uztartuko dituzte ikastaro honetan Aranzadiko kideek. Lehenengo hiru saioak Kultur Etxean emango dira 19:00etatik 20:30etara. Maiatzaren 21ean, asteazkenarekin, 'Zerua ezagutzen' izenburupean, konstelazioak zer diren, zertarako balio duten ikasiko dute, baita planisferio bat zer den eta nola erabiltzen den.

Hurrengo saioan, maiatzaren 26an, astelehenean, 'Orientazio astronomikoa' izango dute hizpide. Bertan, eguzkia, izarrak eta iparrorratzarekin Garai batean nola orientatzen ziren erakutsiko dute eta iparrorratz bat egingo dute. Hirugarren egunean, maiatzaren 28an asteazkenarekin, proiekzio baten bitartez konstelazioak zer diren ikasiko dute parte hartzaileek, garrantzitsuenak ezagutuko dituzte eta, amaitzeko, aterki batean planisferio bat egingo dute.

Astronomía tailerrari amaiera emateko, maiatzaren 30ean, ostirala, gaueko behaketa egingo dute. Horretarako, argi artifizial gutxiko gune batean elkartuko dira 23:00etatik aurrera. Lehenengo teleskopioekin zeruaren behaketa egingo dute eta, ondoren, ikusten denaren inguruko azalpen eta xehetasunak emango dituzte Aranzadiko kideek.