Erabakiak hartuz egiten da bidea

Ekainean Unibertsitatera Sartzeko Proba egingo duten 13.000 ikasle baino gehiagok ere erabaki garrantzitsu bat hartu beharko dute laster: zein gradutan matrikulatuko diren. Lehenengoan asmatzea ez da erronka samurra (bizitzak norabidea aldatzeko aukera gehiago eskainiko badie ere), eta hori errazteko, lan-aukera onenak eskaintzen dituzten adarretan jarri ohi dute mira askok (gurasoek bereziki). Osasuna eta ingeniaritza dira, noski, adar horiek. Ezustekorik ez. Humanitateak ez dira inoiz halako zerrendetan agertuko. Bidegurutze horretan, baina, dauden ikasleek jakin beharko lukete gure mundua ulertzeko, haren norabidea erabakitzeko, oinarrizko pieza direla. Steve Jobsek berak argi zuen: «Teknologia ez da nahikoa. Arteekin eta humanitateekin ere elkartu behar dugu, hunkituko gaituzten emaitzak lortzeko».

Jakina bazen ere, pasa den asteko itzalaldiak inoiz baino argiago utzi zigun premiazkoa dela energiaren alorreko bidegurutzean erabaki irmoak hartzea, lehenbailehen gainera. Izan ere, berriztagarrien aldeko apustuan adostasun zabala zegoela bazirudien ere, laster asko agertu dira nuklearraren abantailak zerrendatzeko prest daudenak. Interes ugari mugitzen dituen alorra izaki, ez da erraza egoera zorroztasunez aztertzen duten ahotsak topatzea, baina horien artean berriztagarrien aldeko joera da nagusi. Hori bai, inbertsio egokiarekin eta hark dakartzan kontraesanak (non, noren edo zeren alboan, nola, nolakoa, zenbat...) onartuz.

Bidegurutzean, erronka zerrenda luzearekin eta erabakiak hartzeko premian. Halaxe dago Reala ere. Eric Bretosengana zuzenduko dira laster begiradak, lehen taldearen inguruan har ditzakeen erabakiengatik, bereziki. Nesken taldearen ardura ere bere gain hartuko du, ordea, kirol zuzendari berriak, eta hor lan eskerga izango duela dirudi. Agur asko, gehiegi, izango ditugu gaurko partidaren ostean. Duela ez hainbeste zerua ukitu zuen taldea, igandeetan Zubietara joateko ohitura ezarri zuena, ia guztiz desagertuko da eta behetik eraiki beharko da proiektu berria. Eskaini diezaiola behar den denbora eta arreta.

Ostegunean bere laugarren edizioa abiaraziko duen Euskaraldiak ere makina bat erronka dakartza –parte-hartzea handitzea, herriz herriko euskaltzaleen artikulazioa bultzatzea, gizartea aktibatzea, erakundeei kargu hartzea...–, baina bakarra gailentzen zaie beste guztiei: euskara ulertzen dutenen hizkuntza-ohiturak aldatzea. Eta, horretarako, edozein ariketa edo kanpainaz harago –hauek erabilgarriak eta beharrezkoak izanik ere–, norberaren hautua baino ez dago. Gure egunerokoa euskaraz bizitzeko hautua.