21 gaztek lehen sektorean garatuko dituzte enpresa proiektuak, belaunaldi aldaketa xede

21 gaztek lehen sektorean garatuko dituzte enpresa proiektuak, belaunaldi aldaketa xede

8 gazte lehendik abian ziren ustiategien kargu egingo dira, eta 13k ustiategi berriak zabalduko dituzte Gipuzkoako Foru Aldundiaren babesarekin

DVDonostia

Gipuzkoako 21 gazte lehen sektorean hasiko dira lanean. 8 gazte lehendik abian ziren ustiategien kargu egingo dira, eta 13k, berriz, ustiategi berriak zabalduko dituzte Gipuzkoako Foru Aldundiaren babesarekin. Horretarako, Aldundiak 831.940 euro bideratuko ditu programa honetara, ongi prestatu eta kualifikatutako gazteak jarduera hauetan has daitezen, belaunaldi aldaketa sustatuz, eta garapena, dibertsifikazioa, enplegua eta enpresen sorkuntza bultzatuz.

«Gipuzkoa ezin da ulertu lehen sektorea gabe. Eta zuek zarete etorkizuna», adierazi du Markel Olano diputatu nagusiak foru jauregian egin den ekitaldian. Ekitaldi horretan egon dira lehen sektoreko hainbat eragile, programan parte hartuko duten zenbait gazte, Aldundiko ordezkariak -hala nola Ekonomia Sustapeneko, Turismoko eta Landa Inguruneko diputatu Imanol Lasa, Nekazaritzako eta Landa Garapeneko zuzendari Xabier Arruti, eta Mendietako eta Natura Inguruneko zuzendari Arantxa Ariztimuño-, nekazari gazteei beren proiektuak aurrera eramaten lagunduko dieten zenbait pertsona eta lehen sektoreari lotutako hainbat eragile.

Deialdi hau urtero egiten bada ere, aurten, lehendabizikoz, topaketa bat egin da sektorean lanean hasiko diren gazteei aitortza egiteko eta haiekin sektorearen etorkizunari buruzko ideiak partekatzeko. Hori horrela, Aldundiaren babesa irudikatu da ekitaldiarekin, Gipuzkoak landa inguruneari eta landa inguruneko jarduerari ematen dion balioa irudikatuz. Solasaldi emankorra izan da, eta gazteen eta lehen sektoreko eragileen ekarpenak, gogoetak eta proposamenak jaso dira bertan. «Egin duzuen apustuak merezi du horren berri ematea. Aurreko legealdian hasitako bideari eutsiz, datozen lau urteotan gogor lan egingo dugu lehen sektorea bistaratu eta sustatzeko, lehen sektorea zuzenean baitago lotuta lurralde oreka, biodibertsitatea, pasaiaren kudeaketa, kalitatezko elikadura edo kultura bezalako balioekin», azpimarratu du Olanok.

Deialdira aurkeztu diren proiektuei dagokienez, bereziki azpimarratzekoak da proiektuen aniztasuna, bai jatorriari eta tamainari dagokienez, bai jarduerari dagokionez. Hori horrela, badira baratzezaintzarekin lotutako proiektuak, frutikulturarekin lotutakoak, ardi, txerri, behi, hegazti edo erle zaintzarekin lotutakoak, nahiz barrengorrien hazkuntzarekin lotutakoak. Horietako bostek transformazio jarduerak egingo dituzte, eta hamaikak laborantza ekologikoa. 17 nekazari gizonezkoak dira, eta 4 emakumeak. Bost urtez, laguntza ekonomikoa jasotzeaz gain, teknikarien aholkularitza eta laguntza ere jasoko dute.

Azken lau urteetan 84 gaztek ekin diote beren proiektu profesionalari programa honi esker.

Temas

Euskera