2019ko uztailean izango da bigarren EuskarAbentura

Iazko espedizioko partaideek topaketa egiteko baliatu dute eguna. /EuskarAbentura
Iazko espedizioko partaideek topaketa egiteko baliatu dute eguna. / EuskarAbentura

Parte hartu nahi duten 16-17 urte bitarteko gazteek motibazio gutuna eta banakako lan bat aurkeztu beharko dute

EuskarAbentura elkarteak 2019ko espedizioa aurkeztu du larunbat honetan, Durangoko Plateruena Kafe Antzokian eta, bide batez, iazko espedizioko partaideek topaketa egiteko baliatu dute eguna. Iazko aurreneko esperientziaren balorazio oso ona egiteaz gain, antoalatzaileek aurreratu dute datorren urteko uztailean 16-17 urte bitarteko 120 gaztek osatuko dutela Euskal Herrian barrena ibiliko den taldea. Abenturan parte hartu nahi dutenek motibazio gutuna eta banakako lan bat aurkeztu beharko dute. Jasotako proiektuak Eusko Ikaskuntzaren eta .eus Fundazioaren laguntzaz ebaluatuko dira eta lan onenen egileek espediziora joateko 'beka' lortuko dute..

Lanak egiteko hautagaiek hiru lan-gairen artean aukeratu beharko dute: 'Maite ditut maite gure bazterrak', 'Joan-etorriak: migrazioen testigantzak' edo 'Errimak eta erritmoak'. Lanak sei formatutan aurkeztu ahalko dira: lan literarioak, musikalak, historikoak, ikus-entzunezkoak, plastikoak eta, aurten estreinakoz, sormen digitalekoak. Matrikulazio epea martxoaren 10era arte egongo da zabalik (10a barne); izen-ematea ekimenaren webgunearen bitartez egin beharko da. Espedizioan parte hartuko duten jzioquitarren behin-behineko zerrenda webgunean argitaratuko da apirilaren 15ean. Matrikulazio kanpainaren baitan, elkarteak hainbat aurkezpen egingo ditu datozen asteetan eskola eta bestelako espazio gazteetan, egitasmoa gazteei helarazteko.

Oso pozik emaitzekin

EuskarAbenturaren ideia 2015eko udan sortu zen, Boiseko (Idaho) Jaialdian. Elkartea lau helburu nagusiren bueltan jaio zen: gazteen artean euskararen erabileran eragitea, mundu mailako gazte euskaldunen sarea sortzea, gure herriaren ezagutzan sakontzea (maila material zein ez-materialean) eta balore positiboak lantzea. «Hasierako ideiari forma ematen hasi, bidelagun berriak gehitu, babesle sare zabala bilatu, gazte kuadrilla paregabea xaxatu, lan-talde zoragarria fitxatu, lan eskerga egin eta 2018ko uztailean espedizioa abiatu zen, ondo abiatu ere. Hain ondo, 2019an errepikatuko dugula» aitortu du Ane Pedruzo elkartekideak.

Elkartea oso pozik dago lortutako emaitzekin, «espero zituztenak baino hobeak» izan direlako. Elkarteko kide den Imanol Zabaletaren hitzetan «pozgarriena, gazteek bizi izan duten bizipenaren balorazio positiboa ezagutzea izan da. Jzioquitarren (espedizioko gazteen) gehiengo handiak errepikatuko lukeela adierazi digu». Lehen edizioko hainbat gaztek hitza hartu dute euren bizipenak partekatzeko. Haroko Ibon Barrasa honela mintzatu da: «Euskara egunerokotasunean erabili ahal izateko animatu nintzen abenturara. Zeharo markatu ninduen eta handik itzultzean euskaraz aritzea lortu nuen familia eta lagun euskaldunekin. Buruz bueltatuko nintzateke baina ezin da errepikatu. Beraz aukera duzuenek, aukera aprobetxatu mesedez». Gasteizko Irune Calvok nabarmendu du esperientziak «euskara beste modu batean ikusteko aukera» eman diola, «bueltan euskara-kontuetara animatzen hasi naiz, 'Gazte Sortegiak' sormen eskolara eta eskolako euskara batzordera, esaterako».

Temas

Euskera
 

Fotos

Vídeos