Ikaslea «subjektu aktibo» bezala ulertzea aldarrikatu du EGK-k

Etorkizuneko euskal hezkuntza-sistemari buruzko hitzarmenaren oinarriei ekarpenak egin dizkie Euskadiko Gazteriaren Kontseiluak (EGK) eta gaur goizean Eusko Legebiltzarrean izan da landu beharreko erronkak proposatzeko. «Ikaslea subjektu aktibo bezala ulertu behar da, prozesuan jaso eta eman egiten duena», azpimarratu du Maialen Olabe EGK-ko presidenteak legebiltzarkideen aurrean.

Olaberen hitzetan «gazteria inplikatuta dagoen» dinamikak bultzatu behar dira administraziotik «hezkuntza sisteman espazioa protagonista» bezala har dezaten. «Ikasleek hitza izatea ezinbestekoa da», aldarrikatu du EGK-ko presidenteak legebiltzarkideen aurrean.

Ikaslea sistemaren parte aktibo gisa ulertzeko bide horretan EGK-k partaidetzan landu eta identifikatutako erronkak jarri dituzte mahai gainean. Lehenik, erabakien demokratizaziorako bidean, egituretan ikasleen botere kuota handitzea eta partaidetza aktiboa sustatzea defendatu dute, espazio ezberdinetan ikasleen ahotsa txertatzeko. Estuki lotuta, eskola komunitatearen baitan ikasleak erabakiguneetan egotearen aldeko apustua egin du EGK-k.

Hizkuntza eta hezkuntza planak ere aipatu ditu Olabek bere hitzartzean. Lehenari buruz «euskararen normalizazioa bermatzeko eta sakon aztertzeko mekanismoak sortzea eta eraginkortzea» eskatu du; eta bigarrenaren harira sortuko diren ikasleak «herritar kritiko» izan daitezen «beste kultura batzuekin elkarbizitzan eta zubiak eraikitzen trebatzea» aldarrikatu du elkarteen plataformako presidenteak.

Azkenik, hezkuntza eredu horizontalako bat sortzeko urratsak ematea eskatu die legebiltzarkideei eta hitzarmenaren oinarriak osatzerakoan eragile anitzen ahotsak kontuan izatea, besteak beste UPV/EHUko Ikasle Kontseilua gonbidatuz. «Badakigu prestutasuna dutela Hezkuntza Sistemaren gaineko hausnarketak partekatzeko», aurreratu du Olabek.

• Temas
• Parlamento vasco
• EHU
• Educación