Adimen artifiziala industria kimikoan aplikatzeko bidean

Nicholas Ballard Ikerbasqueko ikertzaileak José María Asua UPV/EHUko katedradunarekin batera koordinatzen duen Cinema proiektuak Europako Batzordeak emandako 2 milioi euroko finantzaketa jaso du Marie Sklodowska Curie programaren bitartez adimen artifiziala industria kimikoan aplikatzeko bidea ikertzeko.

Cinema proiektuak material polimerikoen diseinua eta ekoizpena iraultzea du helburu, eta horretarako, Adimen Artifiziala erabiltzea proposatzen du: ikaskuntza automatikoko teknikak, alegia.

Nicholas Ballard proiektuaren koordinatzailearen hitzetan, «Adimen Artifizialaren esparruan, ikaskuntza automatikoa gure eguneroko bizitzaren osagai bihurtu da dagoeneko, eta hainbat aplikaziotan erabiltzen da. Esaterako, entretenimenduaren arloan, nolako programak ikusi nahi ditugun iradokitzen diguten gomendio sistemetan, leku batetik bestera nola joan azaltzen diguten trafikoa iragartzeko sistemetan, edota testuen itzulpenetan. Alabaina, industria kimikoaren kasuan asko ikasi behar dugu oraindik ikaskuntza automatikoaren ahalmen prediktibo neurrigabeei probetxua atera ahal izateko». Ballard doktoreak gaineratu duenez, «Cineman informatikaren eta ingeniaritza kimikoaren arloetako mundu mailako liderren partzuergoa antolatu dugu, kimika arloko ezaguera espezifikoak ikaskuntza automatikoarekin uztartzearen alde lan egiteko asmoz, prozesu eta produktu eraginkorragoak diseinatzen laguntzearren».

POLYMAT eta Euskal Herriko Unibertsitatea buru dituen lankidetza bidezko proiektu honek Ganteko Unibertsitateko (Belgika), BCAM-Basque Center for Applied Mathematics zentroko (Espainia), Aachengo Unibertsitateko (Alemania) eta Cambridgeko Unibertsitateko (Erresuma Batua) ikertzaileek osatutako diziplina anitzeko taldea du partaide. Gainera, proiektuak nazioarteko lau enpresa ere ditu babesle: Synthomer GmbH (Alemania), Arkema (Frantzia), BASF SE (Alemania) eta Covestro Resins B.V. (Herbehereak).

• Temas
• UPV