Urteko lehen bertso final handia larunbatean jokatuko dute

Zortzi finalistak/
Zortzi finalistak

Aitor Bizkarra, Eneko Abasolo 'Abarkas', Etxahun Lekue, Jone Uria, Miren Amuriza, Nerea Ibarzabal, Onintza Enbeita eta Xabat Galletebeitia elkartuko ditu Bizkaiko finalak

Bizkaikoa izango da jokatuko den lehen bertso finala. Larunbatean izango da, Bilbao Arenan, Aitor Bizkarra, Eneko Abasolo 'Abarkas', Etxahun Lekue, Jone Uria, Miren Amuriza, Nerea Ibarzabal, Onintza Enbeita eta Xabat Galletebeitia elkartuko dituen finala. Irabazleari Jon Enbeitak jantziko dio txapela.

Xehetasunen berri emateko prentsaurrekoan azaldu bezala,17:00etan hasiko da lehia, aspaldiko finalik parekideena izango dena. Erabakita dago, baita ere, finalean parte hartuko duten gai-jartzaile eta beste parte hartzaileen zerrenda. Asier Ibaibarriaga Bizkaiko Bertsozale Elkartearen lehendakariak eman ditu xehetasunok.

Bizkaiko Bertsozale Elkarteak Enbeita hautatu du lan horretarako bere ibilbidea saritzearren. 1950 jaio zen Jon Muxikan. Bost aldiz kantatu du Txapelketa Nagusiko finalean 1980 eta 1993 urteen artean; beste bostetan izan da Bizkaiko finaletan, eta horietatik bietan izan da Araba-Bizkaiko txapeldun, bi lurraldeak elkartuta txapelketa egin zen urteetan. Bertso idatzietan ere sari ugari jaso ditu.

Halaber, jakinarazi dute gai-jartzaile beharretan ariko dira Idoia Anzorandia Kareaga eta Maite Berriozabal Berrizbeitia. Epaileak, bestalde, hurrengoak izango dira: Ander Txakartegi Basterretxea, Joseba Santxo Uriarte, Jurgi Fuentes Goikoetxea, Leire Etxebarria Gaztelu, Mirari Azula Aurrekoetxea eta Miriam Juaristi Urizar. Idazkari lanetan Itziar Basterretxea Olarreaga arituko da.

Gainera, Ibaibarriagak eskertu nahi izan du antolatzaile eta bestelako langileek burututako lana finalaurrekoen antolakuntza eta garapenean. «Talde Antolatzaileko kideei, Komunikazio Taldeko kideei, gai-jartzaile taldeari, epaile taldeari, bertso eskolei, eta borondatezko beharrean astez aste ibili diren guztiei. Baita ere, zelan ez, astero areto eta frontoiak bete dituzten bertsozale guztiei ere, eurak barik ezingo litzatekeelako txapelketarik egin».

Finalerako sarrerak www.bertsosarrerak.eus orrian eskuratu daitezke, eta larunbatean bertan, txarteldegian, 12:30etik aurrera. Arabakoa izango da jokatuko den hurrengo txapelketa, eta Gipuzkoakoa hurrengoa.

Temas

Euskera
 

Fotos

Vídeos