«Edozein unetan haizea hartzera doan» mundutik gorde nahi dituenak hitzetara ekarri ditu Xabi Bordak
'Urtu aurretik' argitaratu du Susaren eskutik, bere hirugarren poema liburua
n. azurmendi
Astelehena, 28 martxoa 2022, 11:01
Urteak zeramatzan libururik argitaratu gabe Xabi Bordak (Azpeitia, 1981), eta hirugarrena ekarri du gure egunerokoan «mundu hau pikutara doan sentsazioa inoiz baino presentago» dagoen momentuan.
XXI. mendeko hirugarren hamarkada hasi berritan arrastaka daramatzagun klima larrialdiadiari lotutako zenbait kalamidade zerrendatzen hasi zuen Bordak aurkezpena, ondoan Susako editore Leire Lopez Ziluaga zuela. Azken asteetan oso aipatua izaten ari den Kafkaren 1914ko esaldi bat ekarri zuen gogora editoreak: «Alemaniak gerra deklaratu dio Errusiari. Arratsaldean igeri egitera joan naiz».
LIBURUA
-
Izenburua. Urtu arte.
-
Egilea. Xabi Borda.
-
Argitaletxea. Susa.
-
Orrialde kopurua. 88.
-
Salneurria. 13.50 euro.
Horrelaxe gabiltza, alegia: poloak urtzen, munduaren erdia egarri, bestea urpean geratzeko arriskuan, pandemia ezin mende hartu, gerra hemen ondoan, eta geu eguneroko martxari eutsi nahian. «Inoizko mundurik inoizkoenean bizi gara», Xabi Bordaren hitzetan, «Aro Inoizkidean», eta kinka honetan berak erabaki du hitzetara ekartzea, hitzen bidez betikotzea, arriskuan dauden eta gordetzea merezi duten gauzak.
«Poemotan ez da amaiera irudikatu nahi, ez da akaberarekin jolastu nahi. Gutxi axola du horrek», esan zuen. 2020ko gabonetatik 2021eko uda arteko tartean idatzitako poemen xedea bestelakoa da: «Guztia zartatu aurretik ondo begiratu nahi zaio inguruari, jendeari, eta gorde nahi direnak hitzetara ekarri».
«Edozein unetan haizea hartzera doan mundu horri erreparatzeko» ez da urrun joan, oso gertu baititutu gertatzen ari den horren guztiaren zantzu eta ondorioak. Hain zuzen ere, «joan doan mundu hori, bere ziurgabetasunean, larrialdi, krisi eta abar guztiekin, etxe barruan dago, domestiko bihurtu da».
Hala ere, editoreak nabarmendu bezala, «arrunt dirudien egunerokoa ageri denean ere zerbait gehiago gertatzen ari denaren sentsazioa izango du irakurleak». Berak asmatu beharko du zerk eragiten dion sentsazio hori, «egitura narratibo minimo bat» eman baitie Xabi Bordak lau ataletan banatutako 44 poemei, «ia dena ezkutuan» utzirik. Agerikoagoak egingo dira, agian, apiriletik aurrera Felipe Murillo musikariarekin batera egingo dituen aurkezpen-errezitaldietan.
