Kultur ondarea datu baseetan digitalizatu eta gordetzeko joera, hiru adibideren bidez aztergai

Kultur ondarea datu baseetan digitalizatu eta gordetzeko joera, hiru adibideren bidez aztergai
XDZ

Xenpelar Dokumentazio Jardunaldiak maiatzaren 10ean egingo dira, Amasa-Villabonako Subijana etxean; maila estrategikoan nahiz teknikoan emandako pausoak partekatu nahi dira, izandako zailtasunetatik eta abantailetatik elkarrekin ikasteko

El Diario Vasco
EL DIARIO VASCODonostia

Hainbat datu basetako emaitzak aldi berean eta kolpe bakar batean aurkezten dituzten bilatzaileak izango dituzte ardatz aurtengo Xenpelar Dokumentazio Jardunaldiek. Bilaketa bakarra eskaintzea helburu duten esperientziak ezagutaraziko dira aurtengo jardunaldietan. Maila estrategikoan nahiz teknikoan emandako pausoak partekatu nahi dira, izandako zailtasunetatik eta abantailetatik elkarrekin ikasteko. Maiatzaren 10ean egingo dira, Amasa-Villabonako Subijana etxean.

Ahozko ondareak berezko dituen ezaugarriengatik, hainbat gunetan biltzen diren datu eta dokumentazio mota ezberdinak modu bateratuan eskaintzeko beharrak bultzatuta sortu dira aurtengo jardunaldiak, antolatzaileek jakinarazi dutenez.

Herritarrei ondarea esku-eskura jartzeko, ondarearen digitalizazio eta datu bilketa handiak egin dira azken urteotan, eta interneteko gune ezberdinetan antolatu dira. Atari batean eta bestean eskaintzen diren datuak elkar gurutzatzea ahalbidetzen duten bilaketa bakarreko aukerak garatu dira, eta erabiltzaileak, klik bakar batean, ahalik eta emaitza eraginkorrena lor dezake.

Eusko Jaurlaritzak hiru datu-base biltzen dituen Liburubila egitasmoa gauzatu du, eta hori azalduko dute Mikel Aizpuru Eusko Jaurlaritzako Ondare Zuzendariak eta Francisca Pulgar Eusko Jaurlaritzako Liburutegi Zerbitzuko arduradunak. Ipar Euskal Herrian dauden euskal dokumentuen funtsak sarean modu bateratuan eskaintzeko helburua du, bestalde, Bilketa.eus ekimenak; Baionako Mediatekako Marie-Andrée Ouretek emango du haren berri. Artium museoko liburutegi arduradunak, Elena Roserasek, azalduko du museoko dokumentazioa eskaintzeko garatu duten sistema. Eta, azkenik, Aitor Maritxalar informatika garatzaileak bilaketa bakarra eskaintzeko Euskaltzaindiak eta BDB Datu Baseak darabilten Solr sistema zer den azalduko du.

Aurten findu du Xenpelar Dokumentazio Zentroak BDB Bertsolaritzaren Datu Basearen bilatzailea. Solr sistemari esker, hainbat datu base elkar gurutzatzen ditu orain bilatzaileak, eta horrela, ahalik eta emaitza eraginkor eta osatuena eskaintzen zaio erabiltzaileari bilaketa egiten duenean.

Jardunaldien amaieran, iritzi trukerako abagunea izango da. Sarrera doakoa da, baina xenpelar@bertsozale.eus helbidera idatzita eman beharko da izena, maiatzaren 8a baino lehen. Egitarau zehatza irakurri daiteke hemen.

Temas

Euskera