'Kokuioak', euskal-kubatar ikerketa aldizkaria

Sarrionandia Habanako Unibertsitateko Euskara eta Euskal kultura Irakurletzan ari da lanean./GOITIA
Sarrionandia Habanako Unibertsitateko Euskara eta Euskal kultura Irakurletzan ari da lanean. / GOITIA

Joseba Sarrionandiak abian jarri duen aldizkariaren lehenengo zenbakia paperean argitaratu du Pamiela etxeak, baina hemendik aurrera bertsio elektronikoa baino ez da izango

FELIX IBARGUTXI

Joseba Sarrionandiak 'Kokuioak' aldizkaria jarri du abian, 'Euskal-kubatar ikerketa aldizkaria'. Iaztik Habanako Unibertsitatean ari da lanean eta handik kudeatzen du. Lehenengo alea paperezkoa izango da, eta handik aurrera bertsio elektronikoa baino ez da egongo.

Sarrionandiaren proiektu guztiz pertsonala da aldizkaria. «Bere aurkezpen-txartela izatea nahi du», adierazi du Pamiela etxeko bozeramaile batek. Izan ere, argitaletxe nafar honen bidez atera du paperezko lehenengo zenbaki hau. 800 ale inprimatu dira eta, horietatik, 200 joango dira Kubara. Hemen 12 euroan jarriko da salgai.

Aldizkariariaren izenari dagokionez, esan behar da 'Cocuyos' hitzaren euskal ordaina dela 'Kokuioak', eta 'Ipurtargiak' esan nahi duela.

Sarrionandiak ez omen du zuzendari moduan agertu nahi izan, eta hau irakurtzen da aldizkariaren bigaren orrialdean: «Koordinazioa eta edizioa: Joseba Sarrionandia».

Historia, literatura eta etnografia dira hasiera honetako arlo nagusiak. Artikulu gehienak gaztelaniaz datoz, eta hasiera eman diona aldizkariari Josu Landaren 'Lope de Agirre: el poder y la furia' da. Josu Landa, Venezuelan 1953an jaioa, Mexikoko UNAMen ari da lanean, Filosofia eta Letretako fakultatean.

Hurrengo artikulua hau da: 'La barra: un deporte desaparecido en la poética de José Martí', Francisco Maiztegi delako batek idatzia. Aldizkariak dioenez, idazle hau Mutrikun jaio zen 1918an eta Kuban bizi izan da, Puerto de Golpen.

Handik aurrera lan luze hauek eskaintzen dira: 'Hasten nouc bi leroren egiten' (Jean-Baptiste Lahirigoyen); 'La lengua euskera en la ciencia del lenguaje' (Juan Miguel Dihigo), 'Biografía de Jesús de Sarría' (Koldo San Sebastián); 'Ernest Hemingway y Andrés Untzain: una comunión secreta' (Edorta Jimenez); 'Bibliografía de los vínculos históricos y actuales entre Cuba y el País Vasco' (Alexander Ugalde).

Juan Miguel Dihigoren idazlan hori 1933an jendaurrean egindako hitzaldi bateko testua da berez. Zuberoakoa zuen aita Dihigok, eta orain Sarrionandiak lan egiten duen Filosofia eta Letren fakultatea fundatu zuen 1951n, hil baino urtebete lehenago.

Hurrengo sekzioak 'Catauro de textos / Izkribu saskikada' du izena, non tankera askotako testu laburrak –baita olerkiak ere– eskaintzen diren. Lehendik publikatutako material askotarikoak dira. Eta hurrengo bi atalak 'Anecdotario insólito / Gertaera xelebreak' eta Reseñas y comentarios / Erresenak eta iruzkinak' dira.

Joseba Sarrionandia 'Sarri' (Iurreta, 1958) Habanako Unibertsitateko Euskara eta Euskal kultura Irakurletzan ari da lanean. Etxepare Institutuaren erabakiz hasi zen lan horretan iaz, eta argitalpen honetarako Etxepare Insitutuaren beraren eta Mikel Laboa Katedraren diru-laguntza izan du.

Temas

Euskera
 

Fotos

Vídeos