'Mavka. Basoaren zaindaria', euskaraz jada zineman
Mavka, basoko arima, maitasunaren eta zaindari betebeharraren arteko hautu ezinezkoari aurre egin beharko dio gizaki batez maitemintzen denean
I. M.
Ostirala, 28 apirila 2023, 11:53
Ostiral honetan, apirilak 28, helduko da 'Mavka. Basoaren zaindaria' Euskadiko zazpi zinema aretotara, publiko orokorrari bideratutako Aleksandra Ruban eta Oleh Malamuzh ukrainarren animaziozko filma.
Mavka, basoko arima, maitasunaren eta zaindari betebeharraren arteko hautu ezinezkoari aurre egin beharko dio gizaki batez maitemintzen denean.
Goi Mendi Beltzetatik haratago, izaki fantastikoz betetako erresuma bat zabaltzen da. Mavka, baso sorgindu honen zaindaria, basoa gizakien eraso edo intrusioetatik babestea da bere eginkizun nagusia. Abentura hasten da Mavkak Lucas ezagutzen duenean, mendietan musika galdua maite duen gaztea, eta maitemintzen direnean. Arau guztien kontra, Mavkak eta Lucasek maitasun istorio bati ekiten diote, erresuman izango dituzten ondorioak kontuan hartu gabe. Mavkak basoa salba dezake?
Filma Zineuskadi elkarteak sustatutako 'Zinema Euskaraz' programaren eskutik helduko den laugarren pelikula izango da, aurrez aurkeztutako 'Yuku eta Himalaiako lorea', 'Momiak' eta 'Lau ahizpa magikoak' lanen ostean. Zehazki Errenteriako Niessen, Donostiako SADE, Getxo Zinemak, Gran Zinema Zugaza (Durango), Florida Zinemak eta Gorbeia Zinemak (Gasteiz) eta Golem Alhondiga (Bilbo) zinema aretoetan proiektatuko da. Aurrerago Lekeition ere ikusi ahal izango da.
'Zinema Euskaraz' programak beste film batzuk ere eskainiko ditu datozen hilabeteetan, eta hurrengoa maiatzaren 12an iritsiko da zinema aretoetara: 'Little Alan'. Horrela, euskal ikus-entzunezkoen sektoreari laguntzeko konpromisoa berresten jarraitu nahi du ekimenak, eta, euskal zinema sektoreari laguntzeko apustuari helduz, haur eta gazteei zuzendutako filmen bikoizketa bultzatu.
