Andoainen egingo da hilaren 14an aurtengo Bertso Derbia
SD Euskaldunaren mendeurrena dela eta Bastero Kultur Etxean burutuko den saiorako gonbidapenak bertsosarrerak.eus atarian eskuratu daitezke
Asteartea, 3 urtarrila 2023, 14:41
SD Euskaldunaren mendeurrena dela eta, Andoainen egingo da aurten futbol kutsu nabarmena duen Bertso Derbia urtarrilaren 14an. Zehazki, Bastero Kultur Etxean burutuko da ekimenaren 19. edizioa, 12:00etan. Izan ere, egun horretan bertan jokatuko da, 21:00etatik aurrera, ekimenaren jatorrian dagoen Relaren eta Athleticen arteko derbia. Bertsotan burutuko denerako gonbidapenak bertsosarrerak.eus atariak eska daitezke.
Aurtengoan, aurreko edizioetan realzale gisa aritu den Andoni Egañak gai-jartzaile lanak hartuko ditu bere gain. Realaren elastikoa Amets Arzallusek, Alaia Martinek eta Aitor Mendiluzek jantziko dute, eta txuri-gorrien aldean Sustrai Colina, Jone Uria eta Aitor Etxebarriazarraga ariko dira.
Bertso Derbia Real Sociedad Fundazioak eta a Athletic Fundazioak antolatzen dute elkarlanean 2012 urteaz geroztik, «lehia jatorra sustatzeko asmoz». Antolatzaileek nabarmentzen dutenez, «seguruenik, bi futbol-klub lehiakidek bien arteko lehian bizikidetza sustatzeko asmoz elkarlanean antolatzen duten kultura-jarduera bakarra izango da munduan». Bertso Derbiaren bitartez, alegia, «eskenatoki, plaza zein zelaietan bizitzen den zaletasun zintzo bezain aberasgarria sustatu nahi da».
