Zestoa

Santakutz jaiak ospatuko dituzte zestoarrek datozen bi egunetan

Jai giroak hartuko du Zestoa egunotan. Santakutz jaietarako prestaketekin daramate astea zestoarrek baina gaurtik aurrera, lehertuko da festa bertan. Santakutzetan murgilduko da Zestoa eta musikaz, kirolaz eta tradizioz betetako egitarauaz gozatzeko aukera izango dute. Gaur, ostirala, emango zaie hasiera jaiei, eta egun osoko egitarau oparoa prestatu dute. Goizeko 11:00etan jokatuko dira pilotalekuan Santakutzetako Pilota Txapelketaren finalak, eta arratsaldean, 17:00etatik aurrera, pilotalekura itzuli beharko da, Herriarteko Pilota Txapelketari hasiera emango baitiete Abauntzuko pilotariek. Zestoarrek Lazkao hartuko dute etxean.

Arratsaldeko 19:00etan botako dute suziria udaletxetik, festetako hasiera ofiziala iragarriz. Idiakaitz Txistulari taldea eta Azpeitiko nahiz Zestoako udal musika bandak arduratuko dira kalejira alaitzeaz. Ondoren, danborradak izango dira festaren ardatz bi egunetan.

Ostiral gauean, 22:30etik aurrera, helduen danborradak hartuko ditu kaleak. Hainbat elkarte eta talde prest izango dira, azken egunetan egindako entseguen ostean, kalejirari hasiera emateko. Gure Txokoa eta Gaztetxea Zestoako bandarekin; Trapuzarrak eta Zitxontarrak Ustekabe txarangarekin, Ipintza eta Lauiturri Zumai txarangarekin, eta Aldrebesak eta Atabalak Azpeitiko bandarekin ariko dira. Danborradaren ostean, Ustekabe Txarangak jarraituko du festa giroarekin.

Larunbatean, maiatzaren 3an, goizeko 10:30ean esnatuko dira herritarrak Idiakaitz Txistulari taldearen dianarekin.

Eguerdian, 12:00etan, 'Erremontari herriz herri' izeneko erremonte jaialdia egingo da kiroldegian.

Arratsaldean, 18:00etan, umeek hartuko dute protagonismoa danborrada propioarekin, eta 20:00etan, Ane eta Amets trikitilariek girotuko dute festa udaletxeko arkupean.