Zestoa

San Joan suak aldaketa txiki batzuk eragingo ditu bihar

Urtero bezala, bihar, igandea, San Joan sua piztuko da Zestoako plazan. Sua egingo den eremua zaharberrituta dagoela ikusirik eta inolako kalterik ez eragiteko, aldaketa txiki batzuk egingo dira: batetik, suaren tamaina egoera berrira egokituko da, azkar erretzeko moduko errekina erabiliz, eta, bestetik, suak denbora laburragoan iraungo du piztuta.

Horrez gain, zenbait ohar jakinarazi nahi ditu Zestoako Udalak: Sua 22:00ak aldera piztuko da, eta 23:00an, dagoen su-hondarra itzaltzeari ekingo zaio.

Zestoako Udalak jarriko duen errekinaz aparte, guztiz debekatuta dago jendeak bestelako material edo trasteak botatzea su-eremura. Ohar hau sua piztu aurretik zein ondoren zorrozki bete beharko dela nabarmendu du Udalak. Sua piztuta dagoen bitartean, ez da gomendatzen jendea bertara hurbiltzea eta gurasoen eran-tzukizuna da gomendio hori betearaztea, adin txikikoen kasuan. Amaitzeko, arratsaldean zehar, udaltzainak eman ditzakeen jokabide-jarraibideei kasu egitea eskatzen da eta, suaren momentuan, sua pizteaz eta jarraipena egiteaz arduratuko den Eginkizun Anitzeko langileari kasu egitea.