Getaria

Potzuagako tutoretzapeko etxebizitza erabiltzeko prest dagoela iragarri dute

Potzuagako etxebizitza egoera zaurgarrian dauden 65 urtetik gorako herritarren oinarrizko arreta-premiei erantzutera bideratuta dago. Izan ere, Udalarentzat lehentasunezkoa da herritarrek bizitza osoan izan duten erreferentziazko gizarte-sareari eutsi ahal izatea, eta, hain zuzen, behar horri erantzutera dator Potzuagako bizilekua.

Gizarte-zerbitzuek bideratuko dute herritarrak babesteko Udalak egokitu duen bizitokia. 2023ko udazkenean onartu zuen aho batez udalbatzak bizitokiaren erabilpena arautuko duen ordenantza, eta, hain zuzen ere, bertan jasota daude etxebizitza tutelatuaren sarrera irizpideak, erabilera baldintzak, etab.

Egitasmo honen xedea beti izan da premia duten herritarrei etxebitzitza bat eskaintzea. Orain artean ez da horrelako esku-har-tzerik egin, baina, aurreko legegintzaldiaren bukaeran, Getariako Udala etxebizitza arloko zenbait erabaki hartzen hasi zen, eta beraz, ildo horretan kokatu behar da lokalean etxebizitza egiteko egitasmoa. Orain, lanak amaituta eta ordenantza onartuta, herritar bati esleituko zaio etxebizitza. Otsailean baldintzak betetzen dituzten herritarrak etxea erabiltzen hastea aurreikusten da.

Ane Loidi Leunda Udaleko gizarte-zerbitzuetako zinegotzia pozik agertu da Potzuagako lokalean etxebizitza egokitu delako, eta 65 urtetik gorako zenbait herritarren beharrei erantzun ahal izango zaielako. Horrez gain, etxebizitzaren jabetza guztiz publikoa izatearen garrantzia nabarmendu du, baita Udaleko gizarte-zerbitzuetatik kudeatzearena ere.

Iluntzeko 20:00etan Txeruko lokalean egingo da XII. Floren Merialeko Futbito Txapelketaren bilera. Izena emateko orriak bertan banatuko dira (gutxienez, talde bakoitzeko arduradun bat azaldu).