Ehunka andoaindar Korrika hunkigarrira batu dira

Emozioz beteriko Korrika izan da Andoaindik igaro denean. Adunatarren eskutik hartu dute 2.459 kilometroan, eta herriko zazpi puntu ezberdinetan lekukoa eskuz esku igaro da, guztira 44 talde eta eragilek eramanda, Urnietara bidean. Hunkigarria izan da, esate baterako, Ixiar Arin zendutako euskaltzalearen familiak lekukoa hartu duenean, edo EH Bilduko zinegotzia izandako Aitziber Ugartemendiaren senide eta lagunek herrian barrena hartu dutenean. Ehunka andoaindar batu dira euskararen aldeko martxa honetara, eta festa giroak gauera arte iraungo du Malkogarriyak taldearen kontzertuarekin, 17:00etan Zumea plazan, eta 20:30ean egingo den Batzokiko kantu afariarekin.

Egun ikusgarria izan da Urumeako korridorean Korrika igaro ondoren bizitakoa. Arratsaldean, Andoaindik igaro ondoren, Urnieta zeharkatu zuen ibilaldiak. Salestarren ingurutik sartu eta hainbat lekutatik joan zen, festa eta emozio giro bikainaren erdian, gero Hernanin beste hitzordu batera joateko.

Han, errepide zaharrari jarraituz, Txantxilla ingurutik sartu zen, jende-itsaso baten erdian. Larunbat arratsaldea, sagardotegi denboraldia eta Korrika, gehiago ezin da eskatu. Lizeaga auzoa, Urbieta kalea, Zinkoenea edo Hirigune Historikoa zeharkatu zituen lekukoak, Astigarragarako bidea hartu aurretik. Lehenago, Hernanin, herriko hiru euskalzaleri omenaldi hunkigarria egin zitzaien: Malores Etxeberria, Juanjo Uria eta Ricardo Mendiolari.

Astigarragan giroa ez zen txikiagoa izango. Akarregi ingurutik iritsi eta Ergobia auzoa zeharkatuta, martxa jendez gainezka zeuden kale batzuetan sartu zen, Martutenetik Donostiara joan aurretik.

• Temas
• Korrika