Diario Vasco

Teodoro Hernandorena omenduko dute Urepelen

  • 'Xalbador Eguna' ospatuko da asteburu osoan zehar egitarau zabalarekin

'Xalbador Eguna' asteburu osoan ospatuko da, eta, Urepeleko bertsolariaz gain, Emile Larre euskaltzaina eta Teodoro Hernandorena (Zizurkil) politikari eta kulturgilea ere izango ditu gogoan, batik bat, euskaltzale biek «bertsolaritza eta euskal kulturaren alde eginiko lanagatik». Euskaltzaindiak jakinarazi duenez, 2004tik egin izan duten bezala, Deiadarra taldekoek ekitaldiz jositako asteburua prestatu dute Fernando Aire Etxart 'Xalbador' (Nafarroa Beherea, 1920-1976) bertsolaria eta artzaina omentzeko. Gainera, Xalbador Egunaren xedea ez da aldatu ordutik. «Gure nortasuna eta Xalbadorrek utzi zaukun mezua bizirik atxikitzea nahi dugu Euskal Herri osoan» gogoratu dute Deiadarreko kideek.

Aurtengo egitaraua zabala eta anitza da. Gaurko Aldudeko antzerki taldearen emanaldia iragarri dute, Urepeleko eskolan bertan eta 18:30etik aurrera. Ostean, Kepa Junkera eta Sorginak taldearen kontzertua izango da.

Bihar goiz hasiko dira ekitaldiak, Xalbadorren etxolara mendi ibilaldia egingo dela, etxola bera eta Urepel ezagutzeko. Goizeko 10:30ean meza nagusia izango da, eta, ostean (11:15ean), Emile Larre eta Teodoro Hernandorenaren profilak aletuko ditu Joxe Mari Iriondo kazetari eta euskaltzain ohorezkoak jendaurrean. Eguerdi parterako Bilboko Salbatzaile dantza taldearen saioa iragarri dute eta gero herri kirolen txanda helduko da (sokatira, sega, orga altxatzea eta lasto altxatzea, hain zuzen); 14:00etan, eta urtero legez, bazkari alaitua izango da, eta ondoren, haurren txokoa eta bertsolariak (Amets Arzallus, Xebastian Lizaso, Juan Joxe Eizmendi 'Loidisaletxe' eta Jose Luis Gorrotxategi).

Arratsalde partean, trikitilarien jardunarekin agurtuko dute egun seinalatua. Omenaldi berezia izango da; izan ere, Xalbadorrek berak aitortu zuen bere liburu batean Teodoro Hernandorenak eman zituela ezagutzera bera eta Mattin zuberotarra bertso munduan.

Recibe nuestras newsletters en tu email

Apúntate