'Maitasun-ordu bi eta igurtzi zenbait' erakusketa kolektiboa, azaroak 26ra arte

'Maitasun-ordu bi eta igurtzi zenbait' izeneko erakusketa kolektiboa zabaldu dute Alondegiko Oxford aretoan, Harriak programaren baitan. Ander Amuriza (Areatza), Auritz Iñurrieta (Eskoriatza) eta Ekaitz Aiazaguena 'Katza' (Durango) artisten lanek osatzen dute proiektua'; Leire Lacunza (Donostia), berriz, erakusketaren komisarioa edo bitartekaria da.

Erakusketak hiru artisten lanak biltzen ditu, estilo eta diziplina desberdinetakoak. «Desberdinak izan arren, hirurek badute zerbait komunean: inguruko jendea, lagunak, familiakoak... partaide egin dituzte beren lanetan», azaldu du Lacunzak. Alde batetik, Auritz Iñurrietaren pinturak daude, bere inguruko jendearen erretratuak direnak.

Amurizak bi artelan mota ekarri ditu Oxford aretora. Alde batetik, mihisezko oihalaren gainean tinta txinatarrez egindako enborren instalazioa. Eta, bestetik, erakusketa-aretoko horma batean ikusi ahal izango den proiekzioa. «Duela urte batzuk, pilotaleku zahar bat aurkitu zuen mendiaren erdian ezkutuan, eta zaharberritzea erabaki zuen. Lagun batzuk bildu zituen garbitzeko, margotzeko eta ondoren pilotarekin jolasteko. Pieza ez da hor amaitzen, pintatuta dagoenaren gainean berriz pintatu baitute. Dena irudietan jaso zuen, eta orain ikus daiteke proiekzio honetan», azaldu du erakusketaren bitartekariak.

'Maitasun-ordu bi eta igurtzi zenbait' proiektuaren hirugarren zatia 'Katza'-ren musika-pieza bat da. Artistaren arabera, etxean lagunekin entzundako saio baten grabazioaren bidez egindako pieza da. «DJ naiz, eta 70eko hamarkadako Audio Library italiarrarekin lan egiten dut. Pieza honetarako, lehenik saio bat egin nuen, eta, ondoren, entzuteko saio bat grabatu nuen etxean lagunekin, grabagailua etxeko balkoian jarrita. Bozgorailuetatik entzuten dena saio horien emaitza da, etxeko eta kaleko giro-soinuarekin», azaldu du musikariak.

Harriak arte garaikideko programa da, arte bitartekaritzarako, erakusketarako eta dibulgaziorako espazio berriak sortzeko helburua duena. Programa EAEko kultur etxeetako hainbat aretotan jorratzen da, gorabidean datozen artista eta bitartekarien partaidetzarekin, «gailentzen ari direnaz bereziki arduratuz». Harriak Eremuak-en ekimena da, eta herri txikietan sorkuntza garaikidearekiko sentiberatasuna bultzatzera eta artearen inguruko lan- eta gogoeta-prozesuak ikusaraztera bideratuta dago.

Hiru artisten estilo desberdinetako lanak biltzen dituen 'Maitasun-ordu bi eta igurtzi zenbait' erakusketa kolektiboa egunero bisitatu ahal izango da, azaroaren 26ra arte, ondorengo ordutegian: astelehenetik ostiralera 18:00etatik 20:00etara, eta asteburu eta jaiegunetan, 12:30etik 14:00etara eta 18:00etatik 20:00etara.

• Temas
• Zumaia