Dena prest Euskal Encounterren edizio berri batetarako

Teknologia berrien zaleek hitzordu berri bat dute datorren astean, Euskal Encounter topaketaren 31. edizioan. Barakaldoko BECen antolatzen den ekimena uztailaren 22tik 25era bitarte burutuko da eta 150 jarduera baino gehiago antolatu dira lau eguten zehar. Guztira 96 orduz jarraian izango dira, prestakuntza ekintzak, lehiaketak eta ekintza solidarioarekin, besteak beste.

Antolatzaileek jakinarazi dutenez, programatutako 30 tailer eta hitzaldi baino gehiagotan «gaurkotasun teknologikoarekin lotutako gaiak» jorratuko dira, hala nola adimen artifiziala, Gauzen Interneta, zibersegurtasuna edo bideojokoen sektorea. Ekintza horiek doakoak izango dira interesa duen edonorentzat, ez soilik topaketako parte hartzaileentzat.

Halaber, euskal informatikaren festak ohiko atalak izango ditu, hala nola sormen digitala, hardwarea, software librea, jokoak eta beste jarduerak, programazio ludikoena biltzen duen arloa. Jarduera horietan informatikariak eta programatzaileak lehiatuko dira, antolatzaileek planteatzen dizkieten erronkei aurre egiteko.

Bestalde, Opengune parte hartzaileei nahiz publiko orokorrari irekitako eremuan, informatikaren sektoreko enpresek beren produktuak aurkeztuko dituzte, eta Euskadiko Odol Emaileen Elkarteak ere gune bat izango du, parte hartzaile eta bisitari solidarioenen lankidetza bilatzeko.

Gainera, edizio honetan, Euskal Encounterren 'streaming' eremu bat izango du berriro, mundu digitalean hedapen handia duen sektoreko eduki sortzaileek ere euren lekua eduki dezaten bilkuran. Ezagutzak eta esperientziak trukatzeko gune hau izan zen iazko berrikuntza nagusia, eta harrera bikaina ikusita, tarte bat lortu du urteroko egitarauan.

Euskaltel Fundazioa arduratzen da Euskal Encounter antolatzeaz, Eusko Jaurlaritzaren (SPRIren bitartez), Bizkaiko Foru Aldundiaren, BBKren eta Euskaltelen babesarekin. Interneterako sarbidea ezartzeaz ere arduratzen da Euskaltel, segundoko 60 gigabiteko abiadurarekin.

• Temas
• Zabalik