Antxon Mendizabal eskultoreak omendu du Orioko tripulazioa

Orion bizi den Antxon Mendizabal eskultore donostiarrak «eskultura abstraktu-figuratibista» bat oparitu zion atzo Orioko tripulazioari, Euskotren Liga bigarren urtez jarraian irabazi izanagatik. Sapely izeneko egur tropikalaz egindako tailuak hiru atal dauzka. Irudi nagusian, bost emakume ikusten dira, arraunak eta banderak altxatuz; bigarrenean, Euskotren saria erakusten da; eta azkenik, bi mirotz ikusten dira. «Ezohiko egoera honetan, non ezin da ospakizunik egin, omenezko zerbait eskaini nahi nien», esan du Mendizabalek. Ekitaldian, arraunlariak, Xanti Zabaleta entrenatzailea eta Iosu Esnaola presidentea izan ziren.