Pedro nire ile-moztailearen arabera (kasu, botere faktikoei, bereziki Oscar saridunen
izen bera dutenean), ez naiz batere bezero orijinala. Bota berri diodan topiko maiztu hori ... berbera ei da azken urtean ile-apaindegian donostiarrei gehien entzun dien esaldia: «Nik jada Alde Zaharra zapaldu ere ez dut egiten, aizu». Bigarren esaldi errepikatuena beste hauxe omen: «Zorte apur batekin, Woody Allenen pelikula txarra izango da. Ona izatea besterik ez dugu behar; hiria bisitariz gainezka, lehenaz beste!»
Apustuak eginda daude, baina hilabeteak pasatuko dira oraindik emaitza jakin aurretik. Lurraren pareko langa, badakigu zein den: 'Vicky Cristina Barcelona' maisulan gogoangarria. Bagara ba, betizu; ez dugu geure hiria enpo gizendutako ahate okitua izan dadin nahi, gibelandiren batek ederki eskertuko badu ere.
Ikusteke dago gutaz zein irudi emango duten azken boladako film eta telesailek. Kezkatuta gaude, noski, zenbateraino lotsatu beharko ote dugun edo desenkusatu... Lehendik ere makina bat filmetan agertu izan da gure hiria, gorabehera askorekin. Badira gero, lotsatuta edo, telebistan nekez errepikatu izan dituztenak. Esate baterako, inork gogoan al du 'El invierno en Lisboa'? Dizzy Gillespie tronpeta-jotzaile handia ager-tzen zen bertan; konposizio pare bat egin zituen espreski filmerako, hil baino bi urte lehenago. Norbaitek esan zuen soinu banda zela pelikula hartatik salba zitekeen bakarra. Donostia zineman ongien islatu duena, oraindik ere, 27 ordu da nire aburuz. 1986an ekarri zigun Montxo Armendarizek eta zilarrezko maskorra eraman zuen etxera. Garaiko giroa gogora-tzeagatik soilik bada ere, ez dago film hori parean tokatzean Martxelo Rubio, Antonio Banderas eta Maribel Verdurengandik begiak apartatzerik. Hura bai Alde Zaharra hura! Hura bai lanbro ikonikoa! Eta Saguesko bolera? O tempora, o mores! Sasoi ilunak, zinema gordina.
Hiria zinema plato (konbinatu?) bihurtu den honetan, gorputzaldi bitxiarekin abiatu naiz aurten: joan zen urteko Zinemaldia sekula amaitu ez zen sentipenarekin.
¿Tienes una suscripción? Inicia sesión
