Azpeitia

Hiru Erregeen Mahaia gero eta gertuago dago

Apurka-apurka Lagun Onak mendi bazkunako kideak 2023rako ipinitako erronka garrantzitsuenean bidea egiten ari dira. Izan ere, aurtengo egitasmo nagusia Azpeitia eta Hiru Erregen Mahaia hamar etapatan lotzea da eta jada egin dute hirugarrena.

Lagun Onakek antolatutako azken ekitaldietan jende ugari batu da eta oraingoan ere ez da gutxiagorako izan. 130 lagunek hartu dute parte ibilaldian, Goizueta eta Labaien artean. 28 kilometro egin zituzten mendizaleek eta bidean Bilutzikar (807m) – Atsotegieta (1021m), Arainburu (1054m) eta Ekaitza (1046m) tontorrak zapaldu zituzten Auritz zeharkatu eta Labayenen amaitzeko. Orain arteko ibilbiderik gogorrena izan zen. Aurretik dituzte orain beste zazpi etapa. Hurrengoa apirilaren 1ean aurreikusita dago eta Labayen eta Belate lortuko dituzte. 20 kilometro izango dira guztira.

Azken urteetan antzeko egitasmoak antolatu dituzte Lagun Onak mendi bazkunako kideek. Hala nola, Azpeitia-Hazparren, Azpeitia-Bilbo kostatik, Ardoaren eta arrainaren ibilbidea edota azkena, Azpeititik Iruñeara bitartekoa. Urtarrilaren 14an egin zuten Azpeitia eta Hiru Erregeen Mahaia lotzeko aurretik dituzten 228 kilometroen lehen pausoak. Ondo bidean, datorren irailaren 10ean zapalduko dute gailurra, 2.446 metrora.

Temas

• Azpeitia