Lehia aurreko jaia

Txapelketako bertsolariak, atzo Amasa-Villabonan / Unanue

Bersolari Txapelketa Nagusiaren aurkezpen soziala egin da, eta Iñaki Muruaren hitzaldia bertako une hunkigarriena

FELIX IBARGUTXIAmasa-Villabona

Hamazazpigarren Bertsolari Txapelketa Nagusiaren aurkezpen soziala egin zuten atzo Amasa-Villabonako Subijana etxean, Bertsozale Elkartearen egoitzan. Larunbat honetan hasiko baita, Baigorriko pilotalekuan. Atzokoan izan zen bertsorik, izan zen diskurtsorik, eta seguru asko Iñaki Murua lehendakariaren hitzaldiarekin gailurra jo zuen ekitaldiak. Badira hamaika urte Parkinson gaixotasuna diagnostikatu ziotela, orain arte ongi eutsi dio, baina atzo froga latza zeukan: zutik, aurrean mikrofono hankaduna besterik ez zuela, hitz egin behar izan zuen, eta besoak ez ezik, gorputz-enborrak ere dar-dar egiten zion pixka bat. Halako egoeran, haren mezuak indar berezia hartu zuen.

Lehenengo umore eta ironia aldera jo zuen Muruak: «Ikusten duzue bertsolaritzaren mugimendua nigan». Eta, ondoren, mezu hau bertsolariei: «Egin ezazue ekarpen ahalik eta interesgarriena. Baina, batez ere, goza ezazue, horrela gozatuko dugu guk». Eta gero: «Egizue zuena [txapelketa] eta izan dadila denona».

Muruaren hitzekin bukatu ziren atzoko jardunak eta hitzaldiak. Gero talde-argazkiak etorri ziren, eta jan-edanak. Lehendakariaren aurretik, bi bertsolari gaztek -Unai Mendizabal eta Haritz Mujikak- saio umoretsua egin zuten bertso jarri batzuk kantatuz, aldamenean Tomas Lizardi gitarra-jotzailea zutela.

Dantza-saio batekin abiatu zen ekitaldia. Oinkari taldekoek eszenografia erantsi zioten Paxkal Irigoien baxenabartarrak txapelketarako prestatu duen sintoniari.

Gero Aritz Zerain, Bertsozale Elkarteko koordinatzailearekin hitzak etorri ziren. Eskerrak eman zizkion Amasa-Villabonako Udalari -herri horretan baitauka egoitza elkarteak- eta baita txapelketan babesle nagusi izango direnei: Eusko Jaurlaritza, Gipuzkoako Foru Aldundia, Bizkaiko Foru Aldundia, Laboral Kutxa, Kutxa Fundazioa, Euskal Herriko Unibertsitatea, Emakunde, Ikastolen Elkartea, Maier eta Ner Group.

Ondoren, duela lau urteko Txapelketa Nagusian entzundako agurreko saioetako pasarte batzuekin egindako saski-nahaskia entzun zen. Besteak beste, Maialen Lujanbioren bi ideia hauek: «Petoa, traje nazionala» eta «Bertso-eskolak, bertso-gailur guzien oinarrizko kanpamendua».

Bertan ziren orain lau urte BECeko azken txanpan txapela jokatutako bi lagunak: Amets Arzallus -txapelduna- eta Maialen Lujanbio.

Murua, martxora arte

Iñaki Muruak (Gabiria, 1956) martxoan utziko du Bertsozale Elkarteko presidente kargua, Berria egunkariari adierazi dionez. Lan horretan hamabi urte eman ditu, eta datorren urtetik aurrera bederatzi laguneko talde baten esku geldituko da elkartearen gidaritza.

Goierriko lanbide heziketako eskolan atera izan du bizimodua, euskara eta filosofia irakatsiz, eta hortik ere erretiratuko da datorren urtean.

Temas

Euskera

Fotos

Vídeos