Aitor Mendiluze garaile Durangon

Aitor Mendiluze eta Miren Amuriza, elkarrekin oholtzan./IGNACIO PÉREZ
Aitor Mendiluze eta Miren Amuriza, elkarrekin oholtzan. / IGNACIO PÉREZ

740,5 punturekin, alde handia atera dio bigarren gelditu den Miren Amurizari

18 bertsolari Txapelketa Nagusiko finalaurrekoen bigarren itzulian dira, eta seirentzat bukatu da bidea. Igande honetan Durangoko Landakon jokatu den saioa amaituta, eta aurreko guztietako puntuen araberako kontuak eginda, Miren Artetxe, Nerea Elustondo, Maddalen Arzallus, Aimar Karrika, Beñat Iguaran eta Nahikari Gabilondok bertsozale gisa jarraitu behar izango dituzte abenduaren 17ra arteko saioak.

Amaia Ugalderen gidaritzapean, zortziko handian, txikian, puntu-erantzunetan eta sei puntuko motzean aritu da seikotea, eginbeharrekoak kartzelako lanarekin biribilduz: "Amaitu da ospakizuna, dena jasotzen ari zara" gaiari heldu diote oholtzakoek.

Aitor Mendiluzek batu ditu puntu gehien gaurko saioan, 740,5 guztira. Gainerako parte-hartzaileei dagokienez, 678,5 eskuratu ditu Miren Amurizak; 675 Jon Maiak; 671 Oihana Iguaranek; 648 Iñaki Apalategik; eta 639 Miren Artetxek. Hala, finalaurrekoetako bigarren itzulian aritzeko txartela eskuratu du eta Iruñean jarraituko du txapelketan, abenduaren 2an.

Finalaurrekoetako lehen lau saioak eginda, 24 bertsolarietatik 18k egingo dute aurrera bigarren itzulian. Amurrion, Donibane Lohizunen eta Iruñean izango dira finalaurrekoak datozen hiru asteburuetan: azaroaren 19an, 26an eta abenduaren 2an, hain zuzen.

Zuzenean sailkatu diren saioetako irabazleekin batera, puntuazio altuena lortu duten bertsolariak sailkatu dira txapelketan aurrera egiteko. Hauxe da zerrenda:

Maialen Lujanbio (Irungo irabazlea)

Sustrai Colina (Bastidako irabazlea)

Beñat Gaztelumendi (Maule-Lextarreko irabazlea)

Aitor Mendiluze (Durangoko irabazlea)

Aitor Sarriegi

Igor Elortza

Agin Laburu

Miren Amuriza

Jon Maia

Jon Martin

Oihana Iguaran

Jone Uria

Julio Soto

Unai Agirre

Nerea Ibarzabal

Etxahun Lekue

Alaia Martin

Iñaki Apalategi

Temas

Euskera

Fotos

Vídeos