Abian da Txapelketa Nagusiaren azken txanpa

Nerea Ibarzabal, Amurrion izango den bertsolarietako bat./GARI GARAIALDE/XDZ
Nerea Ibarzabal, Amurrion izango den bertsolarietako bat. / GARI GARAIALDE/XDZ

Finalean, Amets Arzallusen ondoan, zazpi bertsolarirentzat dago bakarrik tokia. Amurrion abiatuko dira horien bila finalaurrekoen bigarren itzulira igaro direnak

Bertsolari Txapelketa Nagusiko finalerako azken urratsak egiten ari dira bertsolariak. Izan ere, zazpik baino ezin izango dute lortu aulki bat Amets Arzallusen ondoan abenduaren 17an BECen jokatuko den finalean.

Finalaurrekoetako lehen itzulia amaituta, 18 bertsolarik egin dute aurrera eta bigarren itzulian lehiatuko dira. Fase honek hiru saio izango ditu, eta lehena Amurrion (Araba) izango da, gaur bertan.

Bertsozale Elkarteak jakinarazi duenez, Beñat Gaztelumendi, Etxahun Lekue, Jon Maia, Jon Martin, Nerea Ibarzabal eta Sustrai Colina taularatuko dira Amurrioko Bañueta kiroldegian. Ohi bezala, 17:00etan hasiko da saioa eta ateak 15:30ean irekiko dira. Sarrerak www.bertsosarrerak.eus atarian daude eskuragai eta, aurrez amaitu ezean, egunean bertan ere zabalduko da leihatila 15:00etan.

Eginbeharreko ariketak ere aldatu egingo zaizkie bertsolariei lehen itzulitik bigarrenera. Aintzane Irazusta gai jartzailearen gidaritzapean, hauek izango dira parte hartzaileek egin beharko dituzten lanak: binaka, gaia emanda, hiruna bertso zortziko handian; binaka, gaia emanda, hiruna bertso zortziko txikian; binaka, gaia emanda, zortziko txikian puntutan, zortzi bertso osatu arte; binaka, gaia emanda, hiruna bertso hamarreko txikian; kartzelako lana: banaka, gaia emanda, hiru bertso nahi den doinu eta neurrian.

Azken saioen moduan, Bertsoa.eus atariak eta ETB 4k zuzenean eskainiko dute saioa.

Temas

Euskera

Contenido Patrocinado

Fotos

Vídeos