Maider Arregi oñatiarra irabazle Eskolartekoan

Gipuzkoako txapeldun berria Oñatiko bertso eskolan ari da. Arregirenak izan ziren saioko bertsorik onenetako batzuk. Maialen Lujanbiok jarritako puntuari, adibidez, maisuki erantzun zion:

Arrasatera zatoz

dotore jantzita.

Hala janztean amak

neri esan dit-ta

herri hau nire ustez

ez da hain polita

ta nik ematen diot

ederraren pinta.

Eta despedidako bertsoa, berriz, hau bota zuen:

Oñatiarrez doia agurra

baina ulertuko da lasai

eskerrik asko animaittera

etorri zain jente danai

familixiai kuadrilliai ta

pankartia in yozuenai

bertso eskoliai bebai

baina batez be Iñaki, Gontzal

ta Urko nere anaiai

ni ona naizen ez daukat argi

baina onenak zuek zai!

Patxi Goikolea arrasatearra, bertso eskolen lehen aroko irakaslea -Almeneko lehen eskolaren sortzailea- izan zen atzo irabazleari txapela jantzi ziona. Aurten beste berritasun bat ere bazegoen: hamalau urte arteko bertsolarien lehia bertan behera utzi dute, eta horren ordez saio didaktiko batzuk antolatu izan dira.

Bertso idatzietan, berriz, Maialen Akizu (Urretxuko Institutua) izan da irabazlea handien sailean.