Agerian geratu ziren bertsolari guztien tranpak

Iker Zubeldia ez zegoen saioa ardaztu zuten zortzi bertsolarien artean, izen-abizenik gabeko 'bertsolari gonbidatuen' artean baizik. Eta Zubeldiari egokitu zitzaion saioa bukaerarako bidean jartzea, azkeneko agurra Andoni Egañak egin bazuen ere. Zegamarraren izena entzutearekin bat zabaldu zen aretoan -murmurioa entzungarria izan zen-, animoak afarirako eta afalosteko festarako aldarte egokian jarriko zituen umorearen esperantza. Zubeldiak ederki -eta, itxuraz, gustura eta damurik gabe-, bete zuen eman zioten lana: aurrean zituen adiskideen tranpak agerian uztea. Bakar bat libratu zuen 'salatariak' bere ariketa argigarrian: Maialen Lujanbio, tranparik egiten ez omen duen txapelduna. Gogotik zirikatu zituen adiskideak Zubeldiak eta, entzuleen gozamenerako, erantzunak ere tamainakoak jaso zituen. Eta azkeneko txanpak erakutsi zuen publikoak denetarik nahi duela, baina bereziki estimatzen dituela irribarrerako eta barrerako aukerak.