Mathieu Enderlin artista frantsesa Topic-eko sormen egoitzan

Topic-en sormen egoitzak maizter bat izan du uztailean: Mathieu Enderlin artista frantziarra bere proiektuaren bigarren zatia prestatzen aritu da bertan azken asteetan. Txotxongilo/objektuen antzerkiaren eremuan hizkuntza eszeniko berri bat garatzen ari da, teknologia berriak, antzerkia eta txotxongiloen arteak elkartzearen ondorioz. «Topic bisitatzen dudan lehen aldia da, baita bakardadean dagoen proiektu bati aurre egiten diodan lehen aldia. Hori positiboa iruditzen zait, nire erritmoa erabat aldatu eta hobeto kontzentratzeko aukera ematen baitit», adierazi du artistak.

Zinema ikasten ari zela, Mathieu Enderlin txotxongilo-antzerkiaz arduratu zen. Txotxongiloa irudimena proiektatzeko euskarri gisa irudikatzen hasi zen, aktoreak eta ikusleak partekatzen duten amets baten abiapuntu gisa.

Egoitza honetan Iturburu-kodea izeneko proiektuaren bigarren zati batekin ari da lanean. Proiektuak hiru sorkuntza biltzen ditu, gure egunerokotasunari buruzko galdera batean oinarrituta. Nola aldatzen dute teknologia berriek munduarekin, besteekin eta geure buruarekin dugun harremana? Proiektuaren bigarren zati honetan, bereizten ez dugun eta gure bizitzan gero eta leku gehiago hartzen duen objetu batean zentratu da: telefono mugikorra.

Honela, egoitzan prestatzen ari den 'Smart' txotxongilo-antzerki ikuskizunean telefonoa izango da protagonista nagusia. Guignolse-ko gaztelua antzerki digital bihurtzen da, non telefonoek txotxongilo tradizionalen lekua hartzen dute. Ikuskizuna osatzen duten umorezko eszenek agerian uzten dituzte tresna teknologikoak erabiltzeak guregan eragiten dituzten portaera bitxiak.

Temas

• Tolosa
• Antzerkia